29/01/2026
متنازعہ ادویاتی پودے
( خار دار پودے )
طبی ادویات میں کئی کانٹے دار پودے استعمال ھوتے ھیں جو اپنے ملتے جلتے کانٹے دار پتوں کی وجہ سے اکثر علیحدہ علیحدہ شناخت کرنا دشوار ھوتے ھیں اور کٹارا کٹیلا ، کٹائ ، کنڈیاری وغیرہ ناموں سے پکارے جاتے ہیں ایسے ہی چند پودوں کی علیحدہ علیحدہ شناخت پیش خدمت ھے دوستوں سے گزارش ھے کہ وہ ایسے تمام پودوں کی تصاویر کو محفوظ کر لیا کریں تاکہ مستقبل میں شناخت اور حوالہ کے کام آ سکیں
1، قرطم۔
( Carthamus tinctorious )
اردو قرطم ، کسنبہ عربی۔ معصفر ، قرطم فارسی۔ قرطم ، رنگ زعفران ، کانشہ پنجابی۔ کسنبہ سندھی۔ پواڑی
کثیر شاخوں والی کھڑی 45 تا 60 سینٹی میٹر بلند سالانہ پودا ھے جس کی خام شاخیں سبز اور پختہ سفید رنگ ھوتی ھیں اس کی دو قسمیں ہیں ایک کانٹے دار اور دوسری بغیر کانٹے دار
کانٹے دار قسم کو بیجوں سے تیل حاصل کرنے اور بغیر کانٹوں والی قسم کو پھولوں سے دنگ حاصل کرنے اور چارہ کے طور پر استعمال کیا جاتا ھے
پھول آتشی سرخ ، سرخ و پیلے یا صرف پیلے ھوتے ھیں تخم سفید رنگ حجم میں بنولہ کے برابر صنوبری شکل کے کسی قدر چپٹے چو گوشہ اور سفید مغز سفید اور چکنا کئی علاقوں ( سکردو ) میں اس کے پھولوں کی پنکھڑیوں کو زعفران کہتے ھیں اور انہیں زعفران کی جگہ استعمال کیا جاتا ھے
2، پوہلی
( Carthamus oxycanthi )
قرطم کی یہ قسم پاکستان میں گندم کے کھیتوں میں بہت زیادہ تعداد میں پائی جاتی ھے جو گندم کی کٹائی مشکل بنا دیتی ھے چونکہ اسے جانور بالکل نہیں کھاتے اسلئے اسے تلف کرنا مشکل ہو جاتا ھے مئی جون میں اسکے پودے ھوا کے زور پر دور دور تک لڑکتے جاتے ہیں جس سے اس کے بیجوں کا پھیلاؤ بہت زیادہ ھو جاتا ھے _
3 ، کٹائی کلاں
( Solanum indicum )
اردو ، جنگلی بینگن ، کٹائی کلاں فارسی کٹائی کلاں ، بادنجان دشتی ہندی۔ کٹیلی ، بڑی کٹیلی
چھوٹے چوبی تنے کا 2تا 4 فٹ اونچا پودا ھے جس کی کثیر تعداد میں شاخیں ہو تی ہیں تمام پودے پر تیز نوکدار اور تھوڑے پیچھے کی طرف مڑے ھوئے کانٹے ھوتے ھیں _ پتے بینگن کے پتوں کی مانند پھول ہلکے نیلے پھل بڑے آملے جتنا بالکل گول ملائم شاخ پر ایک ڈنڈی پر سیدھا لگا ہوا کچا سبز جس پر سفید داغ پختہ گہرا پیلا یا نارنجی پیلا
4، کٹائی خورد
( Solanum surattense )
اردو کٹائی خورد ، کٹیلی پنجابی۔ کنڈیاری
زمین پر پھیلا ہوا دائمی پودا شاخیں جڑ سے نکل کر چاروں جانب پھیلی ھو ئی پھیلاؤ 2 تا 4 فٹ شاخوں پر گھنے بربط نما پتے تمام پودے پر تیز اور باریک کانٹے پھول ستارہ نما ایک انچ قطر کا بنفشی یا جامنی مائل نیلا درمیان میں پیلے رنگ کے ریشوں کی ٹکیہ پھل بالکل گول کٹائی کلاں کے پھل کی مانند لیکن اس سے چھوٹے
5 ، ستیاناسی ( زرد پھول والی )
( Argemone mexicana )
چونکہ یہ ایک غیر ملکی پودا ھے اسلئے شروع میں اسکو بھی کانٹوں کی وجہ سے بھٹ کٹایا ، کٹیلا ، اجڑکانٹا ، شیال کانٹا وغیرہ نام دئیے گئے لیکن آخرکار اس کا نام ستیاناسی مشہور ھوا کیونکہ بقیہ نام اس کو دوسرے پودوں سے غلط ملط کر دیتے تھے
ایک تا چار فٹ اونچا نباتی تنے کا کھڑا یک سالہ پودا ھے پتے کٹائی خورد یا اونٹ کٹارا کی مانند تمام پودے پر تیز باریک کانٹے پودا زیادہ گھنا نہیں ھوتا پتوں پر سفید داغ پھول پیلے درمیان میں سرخ نشان ڈوڈا پون انچ چوڑا ڈیڑھ انچ لمبا پھانک دار جس میں گول سیاہی مائل خاکستری بیج ھوتے ھیں
ستیاناسی ( سفید پھول والی )
( Argemone munita )
یہ بھی زرد رنگ پھول والے پودے کی مانند ھے البتہ اس کے پتوں کا سائز چھوٹا ھوتا ھے پھول سفید رنگ جسکی چھ عدد بیضوی پنکھڑیاں درمیان میں پیلے رنگ کی ٹکیہ پھول مارچ تا ستمبر
7 ، اونٹ کٹارا
( Echinops cornigerus )
یہ وہ اصل اونٹ کٹارا ھے جس کا طبی کتب میں ذکر ھے تمام پودے پر تیز کانٹے شاخوں کے آخری سروں پر چھوٹے چھوٹے سفید پھولوں پر مشتمل گولے پھولوں کے ساتھ تیز باریک کانٹے شاخیں سفید رنگ قدیم دو تا چار فٹ
8 ، جگر کٹارا
( Silybum marianum )
انگریزی ، Milk thistle
یہ پودا بھی غیر ملکی ھے جو کچھ عرصہ قبل ھی پاکستان میں متعارف ھوا ھے اور جگر کو تندرست رکھنے کے لئے حیران کن شفائ تاثیر کا حامل ھونے کی وجہ سے مشہور ھو چکا ھے اسے عام طور پر اونٹ کٹارا کہا جاتا ھے لیکن میں نے خصوصیات کے لحاظ سے اسکا نام جگر کٹارا تجویز کیا ھے اور کتاب الادویہ جلد اول میں یہ اسی نام سے درج ھے
بڑے بڑے پتوں والا نباتی ناسوری تنے والا ایک تا ڈیڑھ میٹر بلند یک سالہ یا دوسالہ پودا ھے جسکا تنے کے علاوہ کوئی حصہ بھی کانٹوں سے خالی نہیں پتوں پر سفید رنگ کی بے ترتیب دھاریاں ھر شاخ کے سرے پر اکیلا پھول جس کے چاروں جانب افقی حالت میں لگے ہوئے کانٹے پھولداری تارینہ بہت زیادہ تعداد میں کرنی پنکھڑیاں کاسنی یا گلابی جامنی رنگت والی دنیا میں اسکی دو انواع ہیں جبکہ پاکستان میں اسکی ایک نوع اور دو اقسام ہیں سفید پھول اور گلابی جامنی پھول والی پھول میں 100 تا 190 عدد چھوٹے چھوٹے لمبوترے بھورے بیج ھوتے ھیں جن کے سروں پر باریک اور ملائم ریشے لگے ہوئے جنکی مدد سے یہ ھوا میں اڑتے پھرتے ہیں
9 ، برم ڈنڈی
( Tricholepis glaberrima )
انگریزی Globe Thistle
چھوٹی سالانہ 50 تا 100 سنٹی میٹر بلند بوٹی ھے جسکی زاویہ دار شاخیں ھوتی ھیں پتے بغیر ڈنڈی متبادل 3 تا 6 سینٹی میٹر لمبے نوکدار بیضوی لمبوترے خاردار دندانے دار پھول گلابی پنکھڑیاں کرنی ھر پھول سیدھی شاخ کے سرے پر اکیلا
Cirsium arvense ، 10
بنگالی ، سل کانٹا
دھلی ، کٹیلا ، کٹیلی
پنجاب ، بھُن بھُن
60 تا 100 سینٹی میٹر بلند سالانہ بوٹی ھے جس کے پتے بیضوی لمبوترے 5 تا 15 سینٹی میٹر اور کانٹے دار ھوتے ھیں پھول ہر شاخ کے سرے پر اکیلا ارغوانی یا سفید
یہ بوٹی گندم کے کھیتوں میں عام ھے جو نہ صرف اس کی کٹائی مشکل بنا دیتی ھے بلکہ اس کی پیداوار بھی 25 تا 30 فیصد کم کر دیتی ھے مدر بول ، قے آور ، مقوی اور دافع پیچش ھے
