05/05/2026
أنا خريج هندسة من سويسرا!
منتشر أوي في المواقع الجديدة الشقق الدوبليكس، بس للأسف قليل جدا اللي بيكون دوبليكس فعلي، لكن اللي منتشر إن بيكون شقتين أو شقة وbasement وتتفتح فتحة سلم بعد ما الوحدة تتباع..
يجي العميل يشتري وعاوز يشطب، وبعد ما يقسم الشقة ويحدد بقى مكان السلم، يقول يالا نفتح السلم 🤝😅
هتلاقي حد بقى بيتقال له يا هندسة، هو المتعهد هناك هو ورجالته لعمل فتحات السلم.. والموضوع سهل وبسيط أهو 🤷♂️
من حظي الجميل بقى إن من سنتين ونص كدا وقعت مع واحد فيهم، كان بيعمل حاجة في المبنى اللي أنا فيه، ولما دخل وسلم عرف اننا هنفتح فتحة سلم، فقالي تعالى معايا اوريك الفتحات اللي فتحتها في المنطقة هنا..
حضرتك اسمك اي.. اسمي المهندس فلان.. تمام يا هندسة👌
روحت معاه ٣ اربع دوبليكسات، ولقيت المنظر الرائع اللي في الصورة دي..
١- تكسير الفتحة بهيلتي هامر وصاروخ لقطع اسياخ الحديد..
٢- ظهور واضح لترخيم او ميل للبلاطة "السقف"
هنا كان السؤال البديهي..
عملت تحليل إنشائي يا هندسة قبل ما تفتح السلم؟
قال لي:
لا فتحنا على طول.. انا قديم في الشغلانة دي..
وهنا كان السؤال البديهي التاني..
فيه ترخيم في البلاطة واضح يا هندسة.. هتعالجه ازاي؟
قال لي:
ما أحنا هندعم بكمرة هنا!
وطبعا مفيش اعمدة تشيل الكمرة.. ولو حط كمرة كدا فهي هتاخد البلاطة وتقع لإنها هتكون متعلقة في البلاطة مش شايلة البلاطة!
السؤال البديهي الأخير..
انت خريج هندسة أي؟
قالي هندسة في سويسرا.. اه والله قالي كدا 😅💔
الحقيقة إن اي فتحة سلم بتحتاج تحليل إنشائي من مهندس تصميم إنشائي أو مكتب استشاري
الحاجة التانية المهندس أو المكتب يقولك هتعمل تدعيم فين للبلاطة عشان لو فيه بانشينج او ديفليكشن..
الحاجة التالتة بتفتح السلم بكور أو منشار.. وده طبعا عشان الهيلتي بيعمل اهتزازات شديدة بتؤثر على الأعمدة والكمر وده كارثي على المدى البعيد!
اللي نستفاد منه من البوست ده إن مش أي حد بيتقال له هندسة فهو مهندس فعلا درس هندسة..
مش عيب يا جماعة إنك تقول أنا المقاول فلان.. أو الفني فلان.. أو الاستاذ فلان..
بس حرام وظلم لنفسك وللناس لما تدعي إنك مهندس وأنت بعيد كل البعد عن الهندسة وبتعمل حاجات ممكن تؤثر على حياة الناس وكمان بتسئ لسمعة المهندسين الحقيقيين..
مش منطقي أكون جربت كام دوا وكام طريقة تخسيس عليا وعلى حد، ولما حد يسألني اقوله معاك دكتور بلال وأنا مهندس!
اتقوا الله في حياة الناس وتعاملاتكم 🤚
اللهم إني قد بلغت
#منقول
