16/11/2023
قبل متشتغل محارة لشقتك لازم تشوف البوست ده
هيبقى من كذا جزء وده اول جزء هنتكلم فيه عن الاسمنت .
اول حاجة لازم تعرفها هى رتبة الاسمنت وده عبارة عن مقاومة الاسمنت للضغط .
هتلاقى شركات الاسمنت منزلة 3 اسعار للطن من الارخص للاغلى .
طب اى الفرق بينهم
1- هتلاقى اسمنت مشهور دلوقتى اغلب الناس بتشتغل بيه اسمه ( اسمنت تشطيبات ) ومكتوب تحته ملحوظة انه مش بيستخدم فى اعمال الخرسانات وبيتسخدم فى التشطيبات بس .
ده اوعى تستخدمه لانه ببساطة لما الاسعار بدأت تزيد الشركات بقت بتلم تراب المصانع وتحطه فى شكاير .
ومن كتر الشوائب الى فيه هتظهر مشاكل كتير فى المحارة عندك بعد كدا .
ده بيبقى رتبة 32.5 N وده اقل وارخص نوع .
2- اسمنت رتبة 42.5 N وده الى ممكن فعلا تستخدمه فى التشطيبات وخصوصا فى المحارة وانت متطمن .
3- اسمنت رتبة 52.5 N وده بيستخدم فى فى اعمال الخرسانات والاساسات عشان اكتر حاجة تتحمل ضغط وطبعا بيكون اغلى سعر فيهم .
