25/03/2026
من زراعة البذرة لحد طبق التخليل 👌🌱
رحلة البنجر عندي من البداية للنهاية على سطح البيت ❤️
تمت الزراعة من البذرة في أحواض فوق السطح من منتصف سبتمبر إلي منتصف أكتوبر و ممكن زراعته حتي أول يناير، ومع بداية برودة الجو البنجر بيبدأ يخزن السكريات ويكبر حجمه بشكل ملحوظ، خصوصًا مع الري اليومي.
🔸 التسميد:
استخدمت في بداية الموسم كومبوست من مخلفات المطبخ + سماد بلدي قديم ومتحلل، وده كان كافي جدًا طول الموسم.
لو لاحظت إن الورق نموه بطيء في الشهر التاني → يبقى النبات محتاج دفعة تسميد.
🔸 ملاحظات مهمة:
* في الخريف ومع الجو المعتدل لازم الورق يكبر ويزيد.
* التسميد فقط في فترة الجو الدافي في أول عمر النبات
* مع دخول البرد النبات يبدأ يحجّم ويكوّن الجذر.
* التسميد المستمر بيوقف نمو الثمرة.
* الري المنتظم المعتدل هو السر في تحجيم البنجر (أو أي جذور مثل الجزر و الفجل و اللفت..)
🔸 الحصاد والتجهيز:
* بيتسلق بقشره بعد الغسيل.
* حسب الحجم بياخد حوالي ساعة.
* اختبار التسوية بالسكينة.
* نسيبه يبرد → نقشره → نقطعه.
🔸 التخليل (مضمون وطعمه تحفة 😋):
لكل كيلو بنجر:
نصف كوب سكر + نصف كوب خل + معلقة صغيرة ملح
(والتعديل حسب الذوق)
النتيجة طعم حلو ومميز جدًا 👌
جربوه وقولولي رأيكم 🌿
