28/09/2025
ازاي تشتري اثاث بيتك من غير ما يتضحك عليك !!
انا عملتلكم البوست ده وفي معلومات واسرار هوضحها ومن خلالها هتقدر تجنب الغش في الاثاث اللي هتشتريه .
شفت بوستات لناس كتير الفترة اللي فاتت تعرضت لعمليات غش واحتيال كبيرة .. وعشان كده عملتلكم شرح مبسط .. عشان بسهولة تقدر تتجنب النصب والغش في مجال صناعة الاثاث
المعلومات اللي هنا مهمه جدا والموضوع طويل بس بسيط ويستاهل الوقت
ولو حد عنده اضافة او نقد انا مرحب جدا .
الاول هشرحلكم ايه هي انواع الخامات المستخدمه في صناعة الاثاث وايه هي وظايفها الاساسية :
بتنقسم انواع الخامات ( الاخشاب ) المستخدمه في الاثاث الي 3 اقسام رئيسيه وهي :
-- أخشاب طبيعية ( الموسكي - الزان - الارو - الخ .. )
-- أخشاب نصف مصنعة ( الكونتر - الابلكاش - الخ .. )
-- الياف صناعية . ( mdf و hdf)
وكلمة ام دي اف هي اختصار ل
Medium-density fibreboard
اي - الواح الفايبر ( الالياف ) متوسطة الكثافة .
وكده نستنتج برده منها كلمة HDF ( الباركيه الصناعي ) اختصار ل كلمة
High Density Fiberboard
الواح الفايبر ( الالياف ) عالية الكثافة
اي ان ال mdf و hdf لا تعتبر اخشاب من الاساس لانها الياف صناعية . من الاخر كرتون مضغوط مع اختلاف الكثافة( وعشان كده بيكون في تحذير من تشبعهم بالمايه او تعرضهم للرطوبة ) .
انواع ال mdf بتختلف حسب البلد المصنع ولكنه في الاخر مفيهوش فرق كبير بينه وبين بعضه واللي يغش فيه يبقي جشع يعني اخر حاجه ورزقك بقي انك لبست معاه
فهو اللعب فيه مش كتير فحبينا نخلص منه في الاول .
نيجي بقي للخشب الطبيعي .
انواعه كالاتي : اولا : خشب موسكي ( السويد ) وروسيا والسويد وتركيا من الدول المصدره ليه وهو من ارخص انواع الاخشاب الطبيعية وبيتعمل منه الابواب والشبابيك اللي جودتها قليلة ولا يستخدم نهائيا في صناعة الاثاث لانه لا يتحمل الضغط وصعب الحفر عليه لانه هش .
ثانيا : خشب الزان :المعلومات عن خشب الزان هتلاقي فيها تضارب كبير بين العملاء والمجتمع الغير عامل بالمجال .
ناس هتقولك ده الزان الاحمر ده جميل - لا ده الزان الاحمر الروماني لا ده الابيض كويس .
واحده واحده و الكلام الاكيد بقي :
افضل انواع الزان هما ( الامريكي ) و ( الروماني ) .. ومش هما الزان الاحمر( اللي بيقولوا عليه في السوق ) لان الزان الاحمر ( خدعه الموسم ) هو نوعية من الزان رديئه مقارنة بالزان الروماني او الامريكي وبيتم استيرادها من تركيا و يوغوسلافيا والصين وبيتم للاسف تسوقيها من بعض التجار الجشعيين علي انها نوع كويس ولكنها رديئه ويظهر مشاكلها في شغل الاويمة انها بتفلق ولكن معظم استخدامها بيكون في الانتريهات المودرن والركنات المكسية لان مش هيظهر عيوبها .
خلينا نتفق بقي دلوقتي ان الزان مش احمر وابيض خلاص من النهارده.
الزان امريكي ولا روماني ولا تركي ولا روسي . ( النسبة للبلد اللي جي منها )
بيفرق طبعا نسبة تجفيفه بس لو انت مش عاوز تتعمق اوي يبقي ركز مع المعرض اللي هتشتري منه ان الزان يكون روماني .
وعلي فكرة بقي مبتفرقش كتير معاهم في التكلفة بس هو جشع وخلاص لان بعض المعارض بتكسب الضعف وال 3 اضعاف ومش فاهم بصراحه ليه بيغشوا .
عالعموم ربنا يهدي ..
هنتكلم دلوقتي عن الاخشاب النصف مصنعة وأشهرها خشب الكونتر .
معظم استخدام الاخشاب النصف مصنعه في هيئة الواح بيكون في صناعة المطابخ والدريسنج وبوفيه السفرة واحيانا الركنات .
ببساطه اي حاجه فيها علب واجناب بيخش في تصنيعها الاخشاب نصف المصنعه زي الكونتر لانها بتكون في صورة الواح .
والكونتر انواع كتير جدا بيبدا سعر اللوح من 200 جنيه الي 800
فمش معني ان التاجر قلك احنا خشب كونتر تاخد الكلمه منه وخلاص -- لازم تعرف ايه نوع الكونتر .
اجود انواع الكونتر هو مصري الصنع وبيسمي ( خشب حسن ) او ( جوود وود ) - وده لان تصنيعه بيكون من خشب متقطع كويس ومرصوص جنب بعضه بدون فواصل تقريبا ومكبوس كويس .
الجوود وود نفسه فيه نوعين -- قديم وحديث .
الحديث بيكون خشب لم يستخدم مسبقا وبيكون غالبا موسكي متقطع شرايح ومرصوص جنب بعضه .
اما القديم بيكون خشب مستخدم ولكن استخدام بسيط وبرضه متقطع شرايح ومترصص جنب بعضه .
نبسط الموضوع شوية 😅
الكونتر فيه منه انواع كتير فيه تحت بير السلم وده بيبقي سعره في الارض من 200 وانت طالع لحد 400 وده بيفرق عن الانواع الكويسه في جودة الخشب اللي محشو جوه وجوده تقطيعه ورصه جنب بعض .
في نوع برضه كويس اسمه الفنيه وهو برضه تصنيع مصري واقل من الجوود وود شوية في السعر ولكن جودته جيده ومقبوله .
المهم قبل ما تاخد قرار انك تنفذ اعرف نوع الكونتر المستخدم ايه جوود وود ولا فنيه ولا حاجه تانيه .
وهدف البوست هو نشر الوعي والثقافه العامه .. برا في البلاد المحترمه مفيش عميل بيبقي جاهل بالحاجه اللي هيشتريها بيبقي عنده ثقافه عامه بيقدر بيها يطلب شغل بمواصفات معينه تتثبت في عقد يكون حكم بينه وبين البايع في حالات الغش التجاري .. والثقافه العامه في اي حاجه مطلوبة وانا مش عاوزك تفرق انواع الخشب بنفسك لانه صعب ومحتاج متخصص .. اكتب بس الشروط في العقد واطلب ان نجار تبعك يعاين الخشب قبل التصنيع .. ولو قدرت تثبت حقك في عقد .. هتعرف تجيبه لو اتغشيت بالطرق القانونية وجهاز حماية المستهلك عندنا مبيهزرش .
اتمني اكون فيدتكم ولو بحاجه بسيطه
