10/06/2021
🏠👷🏼♀️👷🏼
🔴👌 حاول تخطط لكل تفصيله قبل ماتبدأ شغل او هات مهندس/ة بيفهم وبلاش نتفذلك ونرجع نشتكي فالجروبات او تابعنا هنحاول نساعدك فيما وراء الديكور ☺️👷🏼♀️🏠
🟣ارسم فرش افتراضي للشقة عشان تقدر تحدد أماكن مخارج الكهربا و السباكة صح.
🟣 اختار كل حاجة قبل ماتبدأ تنفيذ أي حاجة.. دي قاعدة أساسية
🟣🙃 و انت بتقسم شقتك و بتفرشها إهتم براحتك و سعادتك أكتر من إهتمامك بالضيوف لأنك إنت اللي هتعيش في الشقة طول العمر مش الضيوف.
🧑🏭
⚫⚫ لو بياض المحارة وحش و فيه مطبات أو شرخ حاول تعالجه قبل الدهانات.
⚫ لو بياض المحارة لسه فيه عيوب مش عارف تعالجها إستخدم معجون أسمنتي قبل الدهانات.
👩🏼🍳
🔴🔴🔴 اعمل تصميم للمطبخ قبل اي حاجه 👌
🔴🔴 المطبخ من أهم الفراغات في الشقة بلاش تضيق مساحته عشان توسع الريسبشن.
🔴 حاول تختار رخامة المطبخ جرانيت
🔴 اهتم إنك تشتري شفاط محترم للمطبخ.
🔴الشفاط اللي بيركب فوق البوتاجاز شكله حلو و شيك ومهم
🔴 اعمل حسابك تجيب ترابيزة أكل صغيرة في المطبخ دي أهم من ترابيزة السفرة لو مساحتك تسمح طبعا
🔴 الدييب فريزر و المايكروويف أساسيات أكتر من الصيني الكتير اللي ماحدش بيستخدمه.
🔴🔴🔴🙂 الغسالة في الحمام ولا في المطبخ.. في المطبخ ولا في الحمام.. إشتري دماغك و خلي مراتك اللي تقرر عشان تعيش في سلام.
🔴 ركب فلتر في المطبخ عشان مية الشرب في مصر غير صالحة للشرب
👌
🔴🔴 لو معاك فلوس و هاتجيب بورسلين يبقى تختار نوع محترم و فرز أول و يتركب صح بمادة لزق مش بمونة.
🔴 لو ما اخترتش البورسلين صح و ركبته صح هيفك من الأرض بعد سنتين.
🔴 لو حابب تدلع شقتك ركب hdf - hpl في الغرف.. هتنبسط.
🔴 لو مش حابب تدلع شقتك على الأقل ركب hdf في غرفة النوم.. صدقني هتنبسط.
🔴 ركب في الأرضيات السيراميك المستطيل اللي شبه الباركية بس اختار نوع كويس
🔴 إهتم جداً بسقية السيراميك و يفضل تشتري مادة سقية جاهزة و إوعى تلون أسمنت السقية بأكسيد..
👨🔧
🔴🔴🔴 أكتر 3 حاجات عاوزاك تهتم بيها هي تأسيس السباكة و تأسيس الكهرباء و العزل.
🔴 اعمل حسابك لتأسيس التكييف حتى لو مش هتشتري تكيييف
🔴 البيبة في المطبخ حلوة عشان التنضيف لو ليها مكان مع التصميم ومتعوقش اي حاجه
🔴 إعزل الحمام و المطبخ عزل أسمنتي أسهل و أفضل و أرخص
🔵 لو شقتك ضيقه ماتعملش حمام ضيوف عشان الضيوف اللي مش بييجوا غير مرة في السنة.🚽🧻
🔵 في تأسيس السباكة مواسير التغذية أكواثيرم أو باننجر أBR و مواسير الصرف سمارت. ونصار
🔵 لو الحمام بتاعك ضيق ماتركبش بانيو.. قفل كابينة شاور بيلت إن عملية و هتديلك مساحة واسعة.
🔵 الشركات المنتجة لمواسير السباكة المحترمة ممكن تيجي تعملك إختبار ضغط للمواسير و تديلك ضمان مدى الحياة ضد التسريب و عيوب الصناعة.. دي حاجة مهمة.
🔵 الغالي رخيص ف الخلاطات و الإكسسوار و النواكل.
🔵 الأحواض و القاعدة المعلقة بيدوا وسع للحمام و أسهل في النضافة. 👀 والله مش بيبوظ
🔵 إشتري الخلاطات و الصيني و النواكل للحمام و المطبخ قبل ما السباك يأسس.
🔵 قفل حوالين البانيو و الحوض و القاعدة و عند جميع زوايا و أركان الحمام و المطبخ بمادة حقن فواصل من شركة سيكا.. و هتعيش مبسوط بعدها.
🧘🏼
🟣🟣 الدهانات السبونج مش أحلى حاجة في الدنيا.
🟣 ورق الحائط الـ 3d هايل بس بلاش منه.
🟣 دهانات مط او ربع لامع ع حسب المكان و بلاش دهانات لامع.. لان التاني أشيك بكتير.
🟣🟣 حاول في شقتك تكتر من إستخدام الخامات الطبيعية و تقلل الخامات الصناعية بتفرق كتير في الإحساس بالراحة.
🟣 أسس معجون اسمنتي ومعجون اكريليك اسكيب اونوشيلد او سايبس و شطب جوتن أو كيماويات البناء.. ده في الدهانات ياريت
🟣 بلاش تمعجن الحوائط كلها و بعدين تركب السيراميك عشان ده من أسباب ظهور رطوبة بأسفل الحوائط.
🟣 مافيش أشيك ولا أرقى من الدهانات السادة بس تختار الألوان صح.
🟣 لو عندك غرفة أطفال.. ادهنها لون يمشي أولادي أو بناتي.
🟣 بلاش تعمل تفاصيل كتير في الحوائط و الأرضيات و الديكورات عشان تعرف تفرش حضرتك.
🟣🙂 خلي خطيبتك أو مراتك هي اللي تختار الألوان عشان فعلاً هما بيشوفوا ألوان الرجاله مابتشوفهاش
🟣 الـ "ليلاه و البستاج و الفستاج و البيربل و البينك و الأوف وايت و الأون وايت و الأكسيديه و الجراي بيج" دي بعيد عنك درجات ألوان عند البنات أما بالنسبة للرجالة اسمها سمني و عسلي و بصلي و كموني و لموني و مشمشي و فسدقي و حمصي و برتقاني و أي حاجة ليها علاقة بالأكل😂
🪟
🔴🔴 الشبابيك الألومينيوم عملية أكتر من الشبابيك الخشب.
🔴 لو هتركب شبابيك ألومينيوم إختار أي قطاع غير قطاع السعد.
🔴 الألومينيوم بيتدهن ألوان كتير غير البيج و الأوف وايت على فكرة.
🔴 لو معاك فلوس ركب شاتر على الشبابيك الألومينيوم.
🔴 غرفة النوم الرئيسية ركب للشباك بتاعها زجاج دبل
🔴 الشبابيك الجرار بتساعد على سهولة الفرش حتي لو بتقلل الإضاءة و التهوية.
🔴 الشبابيك المفصلية بتزود الإضاءة و التهوية بس هتصعب عليك الفرش.
🔴 لو شقتك واسعة اعمل شبابيك مفصلي و لو ضيقة اعمل الشبابيك جرار.
🔴 الشبابيك الـ pvc جميلة و بتعيش.
🔴 كل الشبابيك احقن حواليها فوم من الخارج و سليكون من الداخل عشان الحرارة و الصوت و التراب.
🔴 الزجاج العاكس للشبابيك بيحجب 50% من الإضاءة.
🔴 الزجاج العاكس للشبابيك بيعكس الصبح بس مابيعكسش بالليل
🔴 ماتنساش تركب سلك لكل الشبابيك عشان الحشرات.
🔴 السلك الفايبر بيتقطع و السلك الصلب بيصدي.. هات سلك صلب أو الومنيوم عشان مايصديش.
👀
⚫⚫ لو شقتك مجروحة من الجيران ماتنساش الستاير البلاك أوت.
⚫ البراقع و البلتكنات اللي حماتك هتختارها دي بطلت من 15 سنة
📽️
⚫⚫ لو شقتك في منطقة مقطوعة ركب كاميرات خارجية مابتتكلفش كتير على فكرة.
🚪
🟤 لو الأبواب الخشب شكلها حلو ادهنها أستر و لو شكلها مش حلو ادهنها لاكية مغسول.
🟤🟤 معابر الأبواب مهمة عشان بتمنع الصوت و الضوء و الحشرات.
🟤 إختار أبواب خشب كويسة عشان ماتندمش و باب الشقة هاته باب مصفح لو معاك فلوس واو مش معاك استلف المهم تجيبوا 😁
🟤 خلي النجار يركبلك جوانات كاوتش لكل الأبواب عشان بتمنع التراب و الصوت. وفي فرش للاتربه بيتباع في السوق حلو برده
🟤 القاعدة الذهبية في إختيار أكر و كوالين الأبواب " الغالي رخيص"
🟤 لو شقتك راكب فيها أبواب وحشة و مش معاك فلوس تغيرها ركبلها وشوش MDF .
🟤 لو مش هتركب باب مصفح لباب الشقة يبقى يفضل تعمل باب حديد حماية. او باب خشب قوي
🧑🎤
🔴🔴 الجيبسوم بورد بيتعمل بيه حاجات كتير غير حركات الأسقف على فكرة.
🔴 الجيبسوم بورد حاجة أساسية بس تستخدمه صح لما تحتاجه.
🔴 جرب الأسقف السترتش اللامعة لو مساحتك مش كبيره ومحتاج تدي وسع للمكان
🔴 الكرانيش الجاهزة (فيوتك) أفضل 100 مرة من الجبس البلدي بس لو الدنيا مظبوطه بالميرزان افقي وراسي
💡
🟡 أكتر حاجة هتخلي شقتك شيك هي توزيع الإضاءة صح.. خلي حد متخصص يوزعلك الإضاءة. او المهندس الل بينفذ
🟡 اعمل حساب كل تفصيله في تأسيس الكهرباء و ماتنساش الدش و التليفزيون و التليفون و النت وكشافات الطوارئ ومقوي الشبكه وبرايز ال USB
🟡 حاول على قد ماتقدر تشتري كل لمبات الشقة لمبات ليد.. هتدفع مبلغ كبير بس هتوفره في فواتير الكهرباء.
🟡 لو هتجيب سخان كهرباء هات سعته كبيرة.
🟡 السخان الفوري مناسب بس في المطبخ لأنه بيستهلك كهرباء كتير. والافضل بلاش منه لو في بديل تاني
🟡 في تأسيس الكهرباء ماتشتغلش غير بسلك السويدي الأصلي أو ديما أو اسلاك معتمده من مصدر موثوق منه زي مؤسسة الهادي أو المعتمد .
🟡 بلاش أباجورة جنب السرير.. ركب 2 أبليك على الحيطة أجمل و أشيك.
🟡 إختار أماكن و مناسيب برايز الكهرباء بعناية عشان دي من أكتر الحاجات اللي هتضايقك لو ما اخترتهاش صح.
🛋️
🟢🟢🟢 اهتم بالليفينج أكتر من الريسبشن.
🔴 لو عاوز تدلع مكان معين في شقتك ممكن تعمل ديكورات بـ CNC بس وظفها صح
🔴 أي حاجة مط بيبان عليها التراب.. لازم تبقى عارف ده كويس.
🔴 مش لازم تجيب نيش.. الجزامة أهم
🔴🔴🔴 ماتجيبش نيش.
🔴🟡⚫🟣 ألوان السجاد- ألوان الستاير- ألوان الفرش- ألوان الأبواب و الشبابيك- ألوان الموبيليا- ألوان دهانات الحوائط و الأسقف- ألوان الإكسسورات و الأنتيكات و التحف و الصور و البراويز... كل الحاجات دي ليها علاقة ببعض ولازم تنسقها صح عشان شقتك ماتبقاش ملعلطة.
⚫ لو الشقة اللي تحتك متشطبة أو ساكنة نبه على العمال اللي في شقتك مايخمروش مونه على الأرض عشان هتنشع على الشقة اللي تحت و جارك هيطلع يتخانق معاك.
⚫ لو الشقة اللي فوقك لسه ما اتشطبتش ابقى اتأكد إنه هيعزل الحمام و المطبخ و يختبر السباكة كويس..
🔴 ماتنساش تركب منشر في مكان بيوصله شمس عشان مهم.
🔴🔴 اعمل حسابك إن تكلفة تشطيب الشقة هتعدي ضعف الرقم اللي انت كنت عامل حسابك عليه.. دي قاعدة لم و لن تتغير ابدا . 🙂 🧙
#ماوراءالديكور 🏠👌👷🏼♀️👷🏼..
منقول
