04/05/2026
ملخص 20 سنة شغل ..
1- و قت الصلاة بنسيب الشغل .
2- و فى السماء رزقكم و ما توعدون .
3- ملكش دعوة بحد .
4- ملكش دعوة بنجاح غيرك .
5- ركز مع نفسك و مع نقط قوتك و ضعفك .
6- الدنيا مبتديش عايز خليك قنوع .
7- " و أن ليس للإنسان إلا ما سعى "
8- متجمعش الصلوات مع بعض .
9- مدخلش عيالك مدارس ب 100 الف جنيه و دخلك ميستحملش ده ..
متجيش على رفاهيتهم و استقرارهم النفسى..
الفسح / الخروج/ السفر/ نتغدى برا يوم دى مش " رفاهيات"
دى حاجه مهمه .
10- كلنا بنحتاج لبعض .. متخسرش الناس .
11- خليك سيرة طيبة الدنيا مش مستاهله .
12- الشغل علاقات كون علاقات قوية جداً و أتعلم منها .
13- أسمع اكتر ما تتكلم .
14- " كتر خيرك / ربنا يوسع عليك / تسلم إيدك /
محدش بيخلص الحاجات دى زيك ".. كلام بسيط بس مهم جداً .
15- حط نفسك مكان مديرك / مكان الأقل منك و الأعلى منك .
16- متشتمش الناس و المكان و العيشة و اللي عايشنها ..
و تنشر طاقه سلبية مش عايز " امشى" .
17- الفلوس مش كل حاجة و الله العظيم .
18- مش هتقبض خمس آلاف جنية أول ما تتخرج .
19- اعرف السوق عايزه ايه و أعرف أنت فين و بتعمل ايه بظبط .
20- متصليش المغرب مع العشاء عشان المغرب بتأذن و أنت على دائرى ..
رتب مواعيدك على مواعيد الصلاة " ده طوق النجاه الوحيد " .
21- حط نفسك مكان الناس قدرهم / أحتويهم / حس بيهم / أعذرهم .
22- الكورسات / الدبلومات/ شهادة التخرج / الماجستير
مش هم الخبرة .. ده يدوبك أول الطريق .
23- مفيش علم بيقل من صاحبه أتعلم و فرهد نفسك علم .
24- متيأسش .. رزق ربنا واسع الدنيا كبيرة ❤
25- كل مكان أشتغلت فى خلي بينك و بينه خيط ..
يسمحلك تعدى عليه و تسلم على ناسه من وقت لتانى .
26- صاحبك لا تناسبه و لا تشاركه .. بس لو قررت تشتغل معاه ..
خليكم جدعان كدا و ماتدخلوش مشاكل الشغل بينكم .
27-متخسرش صاحب جدع و ابن أصول عشان أى حاجة فى الدنيا .
28- ارضى عن نفسك و راضيها متجلدش نفسك كل يوم بليل
"كن حنون على نفسك " .
29- أصحى كل يوم الصبح عندك استعداد تنتج و احمد ربنا على رزقه و الكرسى اللي مستنيك و مكتبك و ادعى ربنا يديمها عليك نعمه .
30- خليك بسيط متتكبرش على ناس و تتعالى عليهم .. كلنا زى بعض ..
هى بس اختلاف ظروف الحياه و اقدار الله .
31- خطط صح و بص لهدف أبعد .. اترزع مليون مره فى حيطه
و لا إنك تبطل تجتهد و تسعى .
32- الدعاء ب " سعه الرزق و الصبر و الرضا " .
33- الوقت عمره ما أتأخر عشان تبقى حاجه .. براحه على نفسك .
34- كلنا مسئولين .. دخلك ميخصكش لوحدك ..
ركز كويس و اعرف إنك لازم تتصدق منه و تزكى منه .
35- إن لبدنك عليك حق .
36 - أهلك و عيلتك و أصحابك فى المقام الأول .
37- متستخسرش فى نفسك خروجة غالية و لا شويه لبس ..
اتبسط و عيش حياتك .
38- متخسرش دينك / نفسك / أخلاقك /مبادئك / أحلامك عشان تعجب حد .
39- الشغل مجرد وسيلة لنعيش حياة أفضل مش أكتر و لا أقل .
40 -إستخير ربنا قبل كل شيء ....وإستعين بالله قبل كل شيء
وقبل كل دا......توكل على الله في كل شيء وكفى بالله وكيلا
