27/05/2014
- الإقبال امبارج كان ضعيف ومن اضعف الأعداد اللى نزلت فى انتخابات عموماً .. الناس المؤيده للسيسى كلها نزلت تنتخبه وترقصله وتهلله .. كلهم نزلوا من اول ما اللجان فتحت .. " كتلتهم مش قويه " .
,
- كل اللى مانزلش النهارده شباب .. او ناس مسلمه ان السيسى ناجح ناجح .. معظم الشباب مانزلش .. الشباب اللى هما انا وانت .. عصب البلد ديه .
,
- الكوره لسه ف ملعبنا .. انزل انتخب حمدين .. له غلطات ؟ بيجرى ورا الكرسى ؟ شايفه مع مصلحته؟ ... .. حمدين رغم كل اخطائه ما خانش بلده ومش هيكون زى السيسى اللى انت شايفه ديكتاتور .
,
- النهارده أجازه رسمى !؟ هقولها تانى .. أجازه رسمى !!
ليه امبارح ما كانش أجازه والنهارده أجازه !؟ مالهاش تحليل غير انهم خافوا وكشوا من الإقبال الضعيف .. ادوا النهارده أجازه عشان الناس تنزل تدى السيسى .. انزل ازعجهم اكتر وارعبهم .. وانتخب حمدين .. والله مرعوبين وخايفين جداً .
,
- شهداء الثوره وغيرها من الكوارث والحوادث من يناير لحد دلوقتى .. مين اللى لو بقى رئيس هيفكر ف حقهم ؟ يمكن حمدين مش هيعمل كده .. بس ( الأكيد ) ان السيسى مش هيعمل كده .
,
- حمدين ماعندوش لا فلول ولا جماعه ولا حزب كنبه يحميه ويفتت معارضيه .. ما تخافش منه .
,
- التطبيل الإعلامى للسيسى فى كل القنوات ده محتاجه ف ايه لو هوا ناجح ناجح ؟!
ليه هيطبلوا لواحد ناجح ناجح ؟! رغم كل ثقتهم فيه وتجريحهم ف معارضيه لسه خايفين جداً على مصالحهم الشخصيه وبيطبلوا ... ( من شويه وائل الإبراشى ولميس الحديد كانوا بيتحايلوا ع الناس ع الهوا عشان ينزلوا ) .. فكّر كده إعلاميين السيسى هيتحايلوا ع الناس ينزلوا ليه لو كانوا فعلاً متأكدين من فوزه ؟!
,
- اللى خايف من التزوير .. انزل انتخب حمدين .. استطلاعات الرأى هتثبت وجود شباب كتير اوى انتخبوه .. اعمل استطلاع رأى بنفسك وصور فيديو .. ازعجهم وحسسهم انك أقوى منهم .. مش هيقدروا يزورا واحنا باصين ف وشهم بكل شجاعه ولو زوروا بنسبه واحنا نزلنا كلنا .. والله ما هتأثّر .
,
- حضرتك ونص الشعب المصرى عصرت على نفسك كيلو لمون وانتخبت مرسى ( اللى باعك كذا مره و سابك تموت ف الشارع عشان غزوة الصناديق و همّشك وحسسك انه امتلك وطنك وانك غريب ) .. اعصر على نفسك نص لمونه بس وانتخب حمدين الوحش .. اللى ع الأقل له موقف واضح ضد الفساد واتبهدل ف عهد مبارك ونزل 25 يناير وأيد الشباب ف معظم مواقفهم الثوريه ونزل معاهم كمان ..
,
- آخر حاجه بقى .. فكر ف المرشح اللى هيكسب .. شوف انت هتقدر تعارض مين وتقوّم مين ؟ حمدين مهما عمل فهتعرف تعارضه وتقوله لأ .. هل هتقدر تقف ف وش السيسى وهوا رئيس .. وهوا أصلاً قضى على كل معارضيه وهوا وزير دفاع !؟
,
,
فكّر تانى .. انزل شارك .. انتخب حمدين .. الكوره لسّه ف ملعبنا يا شباب .. انزل وخد صحابك وقرايبك معاك وانتخب حمدين .. والله لسّه ف أمل .. لو احنا عاوزين ننجحه هننجحه .
