29/05/2020
مكانك في المنتصف
بين الوجود والعدم
بين الحلم والحقيقة
بين الحياة الفاضية
والحياة المليئة
بتفاصيل هي هي بتتكرر
فيها الزمن لا هو صافي ولا هو متعكر
حكاية مش عارف تكملها
ولا حكاية مش عايز تكملها؟
هي هي ولا فيه فروقات؟
زي كل التلميحات
اللي لا بتوصل للجانب الآخر
ولا بترجع بيك لفين ما بدأت
بدأت توصل للحقيقة الكاملة ولا مسألة وقت؟
ولا مفيش حقيقة من أصله
وهتكتشف في نهاية الرحلة
نسبية التشبيه اللي بيتبعها نسبية المضمون؟
بكرة هتسأل لو تلف عينيك
هي الحياة حلوة ولا فيه أحلى؟
ماذا سيحدث لو مكانش الكون؟
هل يا ترى حققت حاجة تستاهل
ومشيت حياتك عادي بمزاجك؟
ولا اللي بيشغلوا اللعبة عرفوا يحركوك
مطرح ما شافوا واقعهم جه على مقاسك؟
ماشي ورا اللي بيقنعوك ويوجهوك
إن الحياة بتموت
وإن الحقيقة ملهاش غير طريقهم بس؟
ولا بتسمع صوتك وهو بيقنعك بالعكس؟
هل لك شبيه ولا؟
قالك بتشبههم كلهم إلا
واحد معرفش راس المال
يجبره يخش وسط غابة التريندات
وعلى كل حال
لسة الحياة بتدور
ولسة فيها حاجات
ولسة الأيام اللي بتشبه بعضها ماشية
بتزق فيها ونفسك تجري بالعافية
أَمَلَك تقلل م الزمن كل ما أمكن
أملك تقلل م الخساير جداً
أو حتى تعدي النص بشوية
أو يظهر شيء من الحقيقة فتبقى مقرية..
وتطلع من الدايرة كإنك فاهم الدنيا
كإنك شفت من الحقيقة حاجة خلاص..
كإنك بتكتب ورقة حياتك كل ده برصاص
واللي اتكتب تقدر في لحظة تبدله
واللي اتقلب تقدر في لحظة تعدله
وتعيش تودي الدنيا وتجيبها
تمسك في روحك بايديها وسنانها
وانت اللي بتسيبها..
29/5/2020
