House Of Dahlias - بيت داليا

22/04/2025

جزء من مقابلتي على قناة صدى البلد برنامج صباح البلد مع رشا مجدي وعبيدة امير ❤️

22/04/2025

جزء من مقابلتي على قناة صدى البلد
مع رشا مجدي وعبيدة امير ❤️

22/04/2025

جزء من مقابلتي على قناة هي ، برنامج حكايات نواعم ، مع ايمي عبد الغفار

https://www.facebook.com/share/v/16NfbkgfaA/?mibextid=wwXIfr

15/12/2024

واخيرا بقى فيه شراء اونلاين من مزرعة من اكبر مزارع انتاج نباتات الزينة - اشتروا منها وانتو متطمنين لجودة النبات وكمان سعره لانهم بينتجوا مش بس بيبيعوا

Embrace the vibrant beauty of Calathea! 🌿

Add a splash of nature's artwork to your home decor with these stunning plants from Egypt Green - Safwat Habib.

https://egyptgreenfarm.com/

15/12/2024

اتكلمنا في الموضوع اللي فات عن الري
ده لينك الموضوع للناس اللي ماشفتهوش
https://www.facebook.com/376799792862669/posts/484584315417549?s=769525482&sfns=mo

النهاردة هنتكلم عن الإضاءة

الضوء من اهم العوامل المحددة لنجاح نمو النباتات الداخلية ولما نتكلم عن الإضاءة فلازم ندرس تلات نقط أساسية
١- شدة الضوء
٢- طول فترة الإضاءة
٣- نوعية الإضاءة

اولا شدة الإضاءة
تقاس شدة الإضاءة بالfoot candle الشمعة-قدم او باللوكس lux
لكل نبات شدة اضاءة معينة ساعتها بتبدأ عملية التمثيل الضوئي اللي بتصنع الغذاء للنبات بحيث شدة الإضاءة ماتقلش عن الدرجة دي ولكن ممكن تزيد وساعتها المصنع هيصنع غذا اكتر وده طبعا في مصلحة النبات
نقدر نقسم شدة الإضاءة لثلاث درجات
اضاءة خفيفة
اضاءة متوسطة
اضاءة شديدة

ثانيا : طول فترة الإضاءة
العامل ده مهم بنفس درجة اهميةً شدة الإضاءة بمعنى ان لو عرضت النبات لإضاءة قوية لكن عدد ساعات قليل ده مش هيفيد النبات في حاجة
فترة الاضاءة المناسبة للنباتات لتتراوح بين ٨-١٢ ساعة
ممكن تقل لست ساعات في حالة كون النبات متعرض لإضاءة قوية جدا
وكذلك تعريض النباتات لإضاءة عدد ساعات من ١٨ ل ٢٤ ساعة غير مفيد للنبات بل مضر وبيؤثر على نمو النبات بالسلب

نوعية الاضاءة
مش محتاجة اقول ان الاضاءة الطبيعية عن طريق الشمس افضل اضاءة للنباتات لان ضوء الشمس يحتوي على موجات مختلفة الأطوال النبات بيقدر يمتص منها الأشعة من الزرقاء الى الحمرا وبالتالي تمثيل ضوئي ممتاز
ولكن بما ان الاضاءة الطبيعية مش متاحة دايما فممكن الاستعاضة عن الاضاءة الطبيعية بلمبات فلورسنت لكن نبعدها عن النبات ٣٠ سم والاضاءة متقلش عن ١٤ ساعة في اليوم

زي ما قلنا في بداية الموضوع ان الاضاءة بتتقسم تلاتة فخليني اقول بعض أمثلة على كل درجة بس نتفق اتفاق الاول مفيش نباتات بتعيش في الضلمة ودي نحط تحتها ميت خط
نقول بقى أمثلة على النباتات

نباتات بتحتاج اضاءة عالية :
دراسينا
دفنباخيا
اريكا
شوفليرا
مونستيرا

نباتات بتحتاج اضاءة متوسطة
تراديسكانتيا
شمادوريا
جينورا
هيدرا
بوتس

نباتات بتتحمل قلة الاضاءة وخطين على بتتحمل لان مفيش نباتات بتحب الاضاءة الخفيفة

اجلونيما
سبدسترا
زاميو
سباثيفيليوم
‏Ferns

وفيما يلي بعض النصائح الخاصة بالإضاءة عشان احصل على افضل نبات
١- لون الحيطان الفاتح بيساعد ان النبات ينمو بصورة افضل لان اللون الابيض بيعمل على عكس الاضاءة فتوصل بشكل مكثف للنبات
٢- الاوراق والسيقان دايما بتروح ناحية الضوء فعشان النبات عندي ينمو بشكل منتظم يفضل ان كل فترة الف البوت بتاعي ٩٠ درجة في
٣- الاوراق اللي طالعة جديد يفضل ماعرضهاش لإضاءة عالية خصوصا لو شمس عشان بتكون لسه ضعيفة فمتتحرقش

15/12/2024

صباح الخير
مشكلة كل النباتات الداخلية بدون استثناء وسبب تعب ٩٠٪؜ منها هو الري
مشاكل الري اربع مشاكل رئيسية
المشكلة الأولي : قلة الري يعني باسيب النبات يعطش جدا ودي اخف مشكلة ليها أضرار اه لكن مش أضرار مميتة ومش صعب إصلاح الضرر الناتج عنها ، يعني اخرها شوية اوراق هتنشف او اطرافها هتسود هانضف الاوراق المضارة وهيطلع جديد مع الري المظبوط
بيندرج تحت مشكلة قلة الماية للنبات ان النبات البوت المزروع فيه صغير عليه والمجموع الجذري كبير جدا لدرجة ان مفيش تربة ومفيش تربة يعني النبات مش بيوصله القدر الكافي من الماية

المشكلة التانية : زيادة الري ودي المشكلة الأكبر
لان ضررها صعب اصلاحه وبتسبب اعفان جذور واعفان الجذور علاجها مش مستحيل لكن صعب على هواة
دايما مانرويش الزرع الا لما نتأكد من ان التربة جفت حسب احتياج النبات
نحس التربة بايدينا قبل الري
المشكلة التالتة : عدم انتظام الري
عدم انتظام الري يعني اعطش النبات جدا وبعدين اروي وبعدين اعطش تاني وهكذا
الموضوع ده بيضعف النبات وبيخليه عرضه برضه للاعفان لو زودت في التعطيش
المشكلة الرابعة والأخيرة : الصرف
دايما أتأكد مِن صرف الاصيص اللي زارعة فيه ويفضل خصوصا في النباتات الداخلية اوسع فتحت الصرف على قد ما اقدر بحيث يكون الاصيص فيه لا يقل عن خمس فتحات كبار قطر الفتحة مايقلش عن ١.٥ سم ويفضل برضه اني أضيف طبقة من الحجر السن بتاع المباني ده في قاع الاصيص عشان يحسن الصرف عندي ، طبقة ارتفاعها حوالي من ٢-٥ سم
ودايما أتأكد ان بعد الري مفيش ماية من اللي رويت بيها قاعدة في الطبق تحت الاصيص بتاعي
باخد النبات في مكان أرويه واستنى لغاية ما التربة تصرف الماية الزائدة عن حاجتها وارجع البوت مكانه
أصص الديكور احيانا مش بيكون فيها فتحات صرف ، دي ماينفعش ازرع فيها مباشرة ، فالحل اني اخلي النبات في اصيص الزراعة العادي واحط الاصيص ده جوه اصيص الديكور ولما اروي اشيله واستنى لما يصرف وارجعه تاني
تابعوا باقي المواضيع اللي هاتكلم فيها عن رعاية النباتات الداخلية زي التربة والتسميد والاضاءة بس حبيت أبدا بالري عشان زي ما بيسموها indoor plants curse أو لعنة النباتات الداخلية

13/12/2024

سيبكم من الموضوع ! دي الدفنباخيا وهي صغيرة 😀😀

صباح الخير
ولسه متابعين مع بعض سلسلة و
اتكلمنا قبل كده عن الري والاضاءة بالنسبة للنباتات الداخلية وعن أهميتهم وخاصة الري وازاي هو روح النباتات الداخلية وبسببه بنفقدها

وعن الاضاءة المثلى للنباتات الداخلية واهميتها

دي روابط المواضيع اللي فاتت عشان اللي مقراهاش

:

https://www.facebook.com/376799792862669/posts/484584315417549?s=769525482&sfns=mo


https://www.facebook.com/376799792862669/posts/485699465306034?s=769525482&sfns=mo

اما النهاردة خلينا النهاردة عن علاقة الاضاءة بالتسميد
في موضوع الاضاءة اتكلمنا عن ان كل نبات بيحتاج لكمية اضاءة معينة عشان يبدا عملية التمثيل الضوئي ويشغل مصنع الغذا بتاعه
لما النبات بيتعرض لإضاءة منخفضة ونضغط عليه بالتسميد ايه اللي بيحصل
اللي بيحصل ان بيحصل استطالة في النبات بمعنى ان السلاميات بتاعته بتطول والساق بتضعف وكمان الاوراق بتاعته بتكون بهتانة
والعكس ، لو الاضاءة قوية حتى مع ضعف التسميد مش مضر للنبات لان كده كده بيشغل مصنعه بكفاءة ولاااكن كمية الغذاء اللي بتتخزن جوه النبات بتكون قليلة لان زي ما قلنا برضه قبل كده النبات بيحتاج ياكل ويشرب ، بيشرب ماية وبياكل من العناصر المتوفرة في التربة وبما ان التربة في النباتات الداخلية بتكون فقيرة فبنحتاج نمده بالعناصر عشان كده لما التسميد بيكون ضعيف مع وجود الاضاءة المناسبة النبات بتظهر عليه أعراض نقص العناصر زي اصفرار الاوراق او تقزم النبات
نستنتج من ده ان فيه علاقة طردية بين شدة الاضاءة وكم العناصر اللي بيحتاجها النبات
كل ما الاضاءة كانت قليلة كل ما باقلل كمية السماد والتسميد يكون على فترات متباعدة والعكس صحيح
كل ما الاضاءة بتكون قوية كل ما أزود التسميد عشان امد النبات بالغذا الكافي عشان احصل على نبات قوي وسليم

04/12/2024