23/08/2021
قبل ما تفكر تركب حوض لرخامة، عندك اختيار من 3 أنواع.
حوض فوق الرخامة أو ساقط في رخامة أو تحت الرخامة.
فوق الرخامة:
هي أحواض في الغالب بتكون صغيرة وشكلها حلو وفي منها المقاس الكبير. بتنفع أكتر لحمام الضيوف وبيكلف أكتر شوية لأنه بيحتاج خلاط عالي (سعره أغلى من الخلاطات القصيرة) لكن في النهاية شكله جميل.
ساقط في الرخامة:
هو الحوض اللي أغلبه بيكون نازل تحت الرخامة لكن الشفة بتاعته بتكوت على الرخامة من فوق.
هو ستايل كلاسيكي شوية وبينفع لأي حمام وللي يحب حمامه يكون كلاسيكي من سيراميك وطقم الحمام. عيبه في التركيب ان المسافة بين شفة الحوض والرخامة لو متقفلتش صح بيكون باين شكل الأسمنت الأبيض أو السيليكون ومع الوقت ممكن لونه يتغير ويفك ومبيبقاش جميل أوي.
تحت الرخامة:
هو حوض كله بالكامل بيكون تحت الرخامة، بيحتاج ان الرخامة تتقطع بالليزر مش بالصاروخ زي الحوضين التانيين لأن الرخامة هي اللي بتكون باينة من فوق.
شيك وجميل ومقاساته مش كبيرة أوي لكن كافي للاستخدام اليومي.
الشكل بيرجع لاختياركوا انما المقاس لازم يتحسب صح قبل قرار تركيب الرخامة.
ميبقاش حمامك صغير وتركب رخامة فتضطر تشتري حوض صغير أوي.. وتكون الرخامة هي اللي واخدة المساحة كلها بدون فايدة. لو حمامك صغير انسى الرخامة.
النقطة الأهم في كل ده هي لما أقطع في الرخامة أسيب كام سنتي من قدام وكام سنتي من جوا حوالين الحوض، المفروض المسافة من قدام متزدش عن 8 سم عشان ميكنش الحوض بعيد واحنا بنستخدمه ونضطر نميل لقدام مما يسبب ألم في الضهر وان مياه كتير هتقع عالجزء ده من الرخامة وهتيجي في ملابسنا.
كل حوض له حمامه واستخدامه وان ال 3 حلوين لكن الأقل فيهم تفضيلاً هو الساقط في رخامة لسبب طريقة تركيبه انما عملياً هو أحسنهم.
