15/02/2026
( بنتريتنج سيلر ) او السيلر الحراري
البنتريتنج سيلر تقدر تشتغل عليه شغل دهانات مائيه وايضا دهانات زيتيه وهو بيقبل الاتنين
وظيفته :_ أساس وتقويه للجبسبورد والجبس البلدي
تقويه وتعضيم المعجون الاسمنتي والمعجون الضعيف علشان لو عاوز تشطب عليه بلاستيك قوي وتلزق تيب براحتك
لو داخل تجدد شغل قديم وجيت تبطن وش سيلر مائي ولاقيت الحيطان بتنفخ منك فالحاله دي ادهن وش بنتريتنج سيلر واشتغل براحتك
شقه لقدر الله حصل فيها حريق وعاوز تعزلها وتأسسها من جديد اعزل بوش بنتريتنج سيلر
حوائط مدهونه زيت قديم وطافح وعاوز تعزلها ادهن وش بنتريتنج سيلر
اي مشكله عندك في الدهانات البنتريتنج سيلر هيحلهالك الا مشكله واحده بس وهي مشكله الرطوبه البنتريتنج سيلر يعتبر مسكن فقط للرطوبه مش حل نهائي عاوز تحل مشكله الرطوبه نهائي عالج مصدر الرطوبه
احنا في الجبسبورد بيقابلنا مشكلتين هما
1_ التنفيخ
2_ اننا بنتيب علي بيت النور علشان نشطب الحوائط فنيجي نفك التيب يخلع ويشيل معانا
انا هقول لحضراتكوا النهارده الطريقه المثاليه لتأسيس الجبسبورد
واكيد بحترم كل الاراء
السر كله في مشاكل الجبسبورد في طبقه الكرتون اللي علي طبقه الجبس ودي اللي بتعمل كل المشاكل لانها اول مابتشم وبتشرب المياه لو بطنت عليها علطول سيلر مائي او اي دهان مائي بتبدأ تفصل عن طبق الجبس وبعد كدا بتبدأ المشاكل
وملحوظه تانيه اللاكيه المط مابيمنعش طبقه الكرتونه ان المياه توصلها لانه بردو بيعمل طبقه سطحيه ومسامي والدهان المائي بيعدي منه لطبقه الكرتون ويبوشها
وهي دي بقي وظيفه البنتريتنج سيلر انه بيتغلغل جوا طبقه الكرتون والجبس وبيعمل طبقه عازله زي الازاز بتمنع وصول المياه لطبقه الكرتون وهو دا السر
ودي هي افضل طريقه لتأسيس وتشطيب الجبسبورد بالخطوات :_
1:_ معجن الفواصل واماكن المسامير فقط في الجبسبورد بالمعجونه الخاصه بالجبسبورد وماتمعجنش بطنيه الجبسبورد دلوقتي خالص ماتقلقش هخليك تمعجنها بس مش دلوقتي
2:_ صفي صنفره لاماكن اللي معجنتها في الفواصل والمسامير
3:_ ادهن طبقه كامله من البنتريتنج سيلر للسقف بالكامل واستني لما ينشف تماما والاحسن تسيبه يوم كامل يعضم معاك
4:_ ادهن طبقه من سيلر جيل نيل وبعدها لو السقفيه مظبوطه معاك شطب وشين من دهان الفنش بتاعك علطول طيب لو اماكن الفواصل فيها عالي وواطي يبقي هتكمل معايا
5:_ بعد ماتدهن وش البرايمر علي البنتريتنج سيلر سيب البرايمر يعضم براحته وبعد كدا اسحب سكنتين معجون البلاستيك بتوعك ولازم المعجونه تكون قويه وشديده
6:_ صفي صنفره وبطن وش تاني بعد الصنفره من البرايمر المائي وبعد كدا شطب وشين الفنش بتوعك وبالنظام دا مش هتلاقي ولا تنفيخ ولا تيب بيخلع معاك
ونفس الكلام دا يطبق علي الجبس البلدي
مع تمنياتي للجميع بالتوفيق
مركز هوس إيروف لدهانات GLC والتلوين بالكمبيوتر ،، شارع كنيسة مارجرجس مدخل البلد بجوار تنمية برزقة الدير المحرق
01281273735
01003628047
