13/04/2026
ماينفعش تمشي بمسطرة واحدة مع كل المهندسين اللي مسئولين منك، وتستنى منهم انهم يحققوا نفس التارجت بنفس الأداء.
وده من الأخطاء اللي وقعت فيها زمان وأنا شغال مدير تنفيذ في أحد المكاتب الاستشارية.
كنت مسئول عن 3 مهندسين تنفيذ، وكل واحد ماسك Zone معينة في مشروع Mega Project.
في البداية كنت بدي لكل واحد تاسكات واضحة، وبشوف التنفيذ وصل لفين، وكان عند كل مهندس تارجت شهري:
نصب 1000 م³ خرسانة لكل مهندس (يعني 3000 م³ إجمالي للفريق).
عدّى شهر واتنين ومش بنوصل للتارجت إلا بالعافية، ومع كمية خناقات وضغط ومجهود غير طبيعي.
ولقيت نفسي مضطر أدخل في كل صغيرة وكبيرة وألعبها Micro Management عشان الشغل يخلص.
ساعتها قلت: لأ، في حاجة غلط, اللي بيحصل ده مش طبيعي.
استشرت حد من المرجعيات بتوعي في المجال، وقاللي جملة عمري ما نسيتها:
"يا تنين، ما تعاملش كل المهندسين اللي معاك بمسطرة واحدة.
كل واحد له دخلة معينة من حتة معينة، لو ركزت شهر واحد على رجالتك مش على التارجت، هترتاح باقي المشروع."
وفعلاً بدأت ألاحظ كل واحد فيهم، وأفهم نمطه وطريقة تفكيره ونقط قوته وضعفه، وكانت النتيجة غريبة جدًا 👇
👷♂️ المهندس الأول:
لقيته لما بشد عليه أو أوصله إحساس إنه مقصر بيتكعبل نفسيًا جدًا، ويبدأ يجلد نفسه ومستواه يقل.
الدخلة الوحيدة اللي تمشي معاه هي التحفيز والمكافآت: فلوس، إجازة، أو حتى عزومة غداء.
اكتشفت إنه بينور لما بكافئه في آخر الأسبوع، ولو مفيش مكافأة مالية كنت أقول له:
"الله ينور، إيه العظمة دي؟ ده أنت جامد جدًا يا راجل مين عثمان أحمد عثمان ناو!" 😄
وعرفت بعدين إن أمه كانت بتعامله كده وهو صغير.
👷♂️ المهندس التاني:
نظام المكافآت ملوش تأثير عليه، لأنه مش محتاج الشغل كمصدر دخل وأبوه بيصرف عليه.
لكن اكتشفت إنه جعان تعليم وخبرة، جاي الموقع عايز يفهم تنفيذ صح ومفيش حد علمه قبل كده.
فبدأت أقول له:
"زبط شغلك، وأنا هاعلمك كل يوم حاجة جديدة في التنفيذ مسمعتهاش قبل كده."
لقيته اتغيّر تمامًا، بقى يخلص شغله بسرعة وبدقة عشان يلحق الساعة اللي بيقعد فيها معايا أشرح له.
فعلاً بقى بيأكل الشغل أكل عشان يتعلم.
👷♂️ المهندس التالت:
ده بقى كان صندوق مقفول! حصن منيع مش عارف أدخل له منين,
كنت موفّر له كل حاجة وبرضه بيتكعبل، لحد ما قعدت معاه ساعتين كاملة أفهم هو ليه عطلان دايماً.
في الآخر قاللي:
"أنا مبعرفش أشتغل بتارجت. لو عاوزني أوصل لـ1000 متر خرسانة، ومطلوب مني عشر خطوات مثلا لازم تقولي العشر خطوات اللي أعملهم واحدة واحدة، وأنفذها بالترتيب. أنا مش بعرف أرتب دماغي لوحدي."
ساعتها فهمت إن اللي يناسبه هو المتابعة الدقيقة والـMicro Management.
ولما بدأت أتعامل معاه كده، بقى يحقق التارجت وزيادة كمان في وقت أقل من زمايله.
الشاهد انا مش بقول الكلام ده عشان أقولك الصح والغلط,
مفيش صح وغلط مطلق في الإدارة، لكن فيه تجارب بتعملها مع الناس اللي مسئولة منك.
لو عرفت "الدخلة" الصح لكل واحد في فريقك، هتطلع منهم بأحسن أداء من غير خناقات ولا ضغط ولا مجهود مضاعف, وهتعرف تجيب بيهم أحلى أجوان.
👇
منشن المهندس اللي شغال معاك وحابب توصله الكلام ده 💬
