25/07/2022
✅ მეგობრებო გამოვიდა გია რაზმაძის წიგნი „რეგენერაციული აგროკულტურა“, სახელმძღვანელო, რომელიც დაბეჭდა გამომცემლობამ „სეზანი“. სახელმძღვანელო შედგენილია და გამოცემული გაეროს განვითარების პროგრამის (UNDP) და შვეიცარიის განვითარებისა და თანამშრომლობის სააგენტოს ფინანსური მხარდაჭერით.
წიგნი განკუთვნილია ფართო საზოგადოებისთვის, მათთვის, ვინც დიდი ხანია დაკავებულია სოფლის მეურნეობით და ეწევა ფერმერობას, და ასევე მათთვის, ვინც თავის აგარაკსა თუ სოფლის ნაკვეთზე ახლა იწყებს მცენარეების გამრავლებას და მოსავლის მოყვანას. ასევე, ვისაც აწუხებს ეკოლოგიური პრობლემატიკა, ვინც ცდილობს ახალი გზები იპოვნოს, ნოვატორული მეთოდები გამონახოს, რათა თავი დავაღწიოთ მოსალოდნელ, მოახლოებულ კატასტროფულ მოვლენებს.
სახელმძღვანელოდან ვიგებთ, რომ ინდუსტრიული სოფლის მეურნეობის საქმიანობის შედეგად, დედამიწის სასოფლო-სამეურნეო სავარგულების დაახლოებით ნახევარი იმდენად გადაგვარდა, რომ მასზე მოსავლის მოყვანა უკვე შეუძლებელია. გაეროს მონაცემების თანახმად, ყოველწლიურად, სულ ცოტა, 12 მილიონი ჰექტარი მიწა დეგრადირდება ანუ, ფაქტობრივად, კვდება. თუ ასე გაგრძელდა, 2050 წლისთვის კაცობრიობას მასობრივი შიმშილი ელის.
ამ კატასტროფული მოვლენების თავიდან ასაცილებლად საუკეთესო საშულებაა რეგენერაციული აგროკულტურა. შეიძლება ითქვას, რომ ესაა მიდგომა, რომელიც თავის მთავარ მიზნად ისახავს ნიადაგის გაცოცხლებას, გაჯანსაღებას, დაცვას, ეკოსისტემების შექმნას, ეკოლოგიური პროცესების მნიშვნელობის გააზრებას და ამ პროცესების რეალურ, ქმედით მხარდაჭერას.
წიგნში აღწერილია პრინციპები და მეთოდები, რომლებიც ადამიანს საშუალებას მისცემს, საკუთარ მეურნეობაში ბუნებრივი, მდგრადი ეკოსისტემა თავის ხელით შექმნას. ავტორი ამ პრინციპებსა და მეთოდებს არა მხოლოდ გარეგნულად აღწერს, არამედ მათი მოქმედების შინაგან მექანიზმებსაც განმარტავს, რაც ძალზე მნიშვნელოვანია.
გია რაზმაძე მიმოიხილავს ნიადაგის მოვლის ეკოლოგიურ პრინციპებს, ჰუმუსის, ნიადაგური ტენის, კონდენსატის წარმოქმნის მექანიზმებს, ფუკუოკას, ოვსინსკის, ალან სავორის, ანდრე ვუაზანის, ერნსტ გიოტჩის მეთოდებს, ქართული ვენახის გაშენების თავისებურებებს და სხვა საინტერესო საკითხებს.
გია რაზმაძის წიგნი „რეგენერაციული აგროკულტურა“ უმნიშვნელოვანესი შენაძენია სოფლის მეურნეობით დაინტერესებული საზოგადოებისთვის - ესაა ქმედითი საშუალება, რეალური ცოდნა, რომელიც დაგვეხმარება ახალი, ნოვატორული, ეკოლოგიური, ნატურალური, ბუნებრივი, უხვმოსავლიანი, ნაკლებდანახარჯიანი მეურნეობები გავაშენოთ და ჩვენი სოფლის მეურნეობა გამოვაცოცხლოთ.
წიგნი გაიყიდება 2022 წლის 1 აგვისტოდან „ბიბლუსის“ მაღაზიათა ქსელში.
ირაკლი ლომოური
მწერალი და მთარგმნელი
