15/11/2025
سلێمانی ٢٤١ ساڵە: لەنێوان شانازیی مێژوو و نیگەرانیی ئێستادا
لە ٢٤١ـەمین وێستگەی تەمەنیدا، سڵاو بۆ سلێمانی، ئەو شارەی کە وەک پایتەختی ڕۆشنبیری و مەڵبەندی داهێنان ناسراوە. مێژووی ئەم شارە پڕە لە شکۆ، لە کۆڵانە باریکەکانی سەراوە تا دەگاتە منارەی مزگەوتی گەورە کە وەک شوناسێکی تەلارسازی، ئاسۆی شارەکەی دیاری کردووە.
کاتێک ئیبراهیم پاشا بەردی بناغەی سلێمانی دانا، خەونێکی گەورەی بۆ شارێکی مەدەنی و پێشکەوتوو هەبوو. ئەمڕۆ دوای ٢٤١ ساڵ، ئێمە میراتگری ئەو خەونەین. میراتگرین لە شارێک کە هەمیشە لانکەی نوێگەری بووە.
بەڵام لەگەڵ ئەم یادەدا، پرسیارێکی جدی دێتە ئاراوە: ئایا گەشەی ئەمڕۆی سلێمانی، لە ئاست ئەو میراتە دەوڵەمەندەدایە؟ وەک تەلارسازێک، بە نیگەرانییەوە دەڕوانمە ئەو پاشاگەردانییەی لە بواری بیناسازی و نەبوونی دیدگایەکی ڕوونی شارسازیدا هەیە. گەشەی هەڕەمەکی و پشتگوێخستنی ژێرخانەکان و خزمەتگوزارییە سەرەتاییەکان، وای کردووە سیمای شار بەرەو ناشرینی و شێواوی بڕوات. لە کاتێکدا جیهان بەرەو تەلارسازیی بەردەوام (Sustainable Architecture) و شاری زیرەک (Smart City) هەنگاو دەنێت، سلێمانی لەم ڕەوتە جیهانییەدا دواکەوتووە.
وەک تەلارسازێک، هەست دەکەم گەشەی ئێستای شارەکە لەگەڵ ئەو ڕۆحە نوێخوازەی خۆیدا یەکناگرێتەوە. بینینی باڵەخانەی بێ ناسنامە، گەڕەکی بێ خزمەتگوزاری و نەبوونی فەزای گشتیی کوالێتی بەرز، ئاماژەن بۆ ئەوەی سلێمانی لەڕووی تەلارسازی و شارسازییەوە پێویستی بە خوێندنەوەیەکی نوێ و بوێرانە هەیە. دواکەوتن لە کاروانی تەلارسازیی جیهانی و پشتگوێخستنی بنەماکانی شارسازیی مۆدێرن، مەترسین بۆ سەر داهاتووی ئەم شارە خۆشەویستە.
ئەم یادە دەرفەتێکە بۆ ئەوەی تەنها ئاوڕ لە ڕابردوو نەدەینەوە، بەڵکو بە شێوەیەکی جددی بیر لە داهاتوو بکەینەوە. سلێمانی پێویستی بە دیدگایەکی تەلارسازیی ڕوون، پلانێکی ستراتیژی بۆ گەشەکردن و ئیرادەیەکی سیاسی و جەماوەرییە بۆ جێبەجێکردنی. دەبێت وەبەرهێنان لە ژێرخان و جوانکاری و پاراستنی سیمای شاردا، ببێتە ئەولەویەت.
پیرۆزباییمان بۆ سلێمانی، بانگەوازێکە بۆ کارکردن پێکەوە، تا شارەکە بکەینەوە بەو شوێنەی کە شایستەی مێژووەکەی و خەڵکەکەیەتی؛ شارێکی جوان، خاوەن خزمەت و هاوچەرخ.
بەو هیوایەی یادی داهاتوو، لە سلێمانییەکی ڕێکخراوتر، خزمەتکراوتر و جوانتردا بکەینەوە.
ئەندازیاری تەلارساز
بڕوا ڕەشید
..................
#سلێمانی #٢٤١ساڵ
