Faly Nomenjanahary Tsilavina

19/11/2025

Gasikara

Toa kanto loatra hono ianao ry gasikara?
Fa...Gasykarakaina
Taloha ianao toa maitso,
Mavana sy tsara,
Ankehitriny anefa toa lasa Nosy maina

Eny, na ny mponinao aza,
Tsy toy ireo taloha
Fa niova sy nivoatra, ary dia malaza
Fa...Gasykarandoha

Tsy fantatra intsony izany valin-tanana,
Malaza tsy hihinanana toa vilian-tsahona
Fahiny ny asa atao aza toa hifamaliana,
Fa ny androany kosa toa...Gasykaramaina

Raha tonga ny mpananika hanafika tanàna,
Niray ny Malagasy fa hiaro izato Nosy,
Izao anefa aloha tsy izay no zava-misy,
Malalaka ny Tany fa...Gasykarakara

Malaza hono mantsy fa maro sy mitombo,
Ireo miditra an-tsekoly
Izany anie tsy lavina e...Marina daholo
Tsy arakarak'io anefa ny zavatra mahazo,
Mbola hita taratra eny fa...Gasykarabado

12/11/2025

Kitapo feno rano

Lozanao ry fiainana!
Ny antambo aterakao
Fa toa misetrasetra
Sy tsy mba mahay mitsetra
Ka manimba tsotr'izao

Firifiry moa 'reo efa nitalao?
Fa(...) mafy loatra 'lay topan'onjanao
Tsy vitsy ireo nivalo, nilaza fa mijaly
Fa(...) mafy loatra 'lay topan'onjanao

Endrey, ireo kitapo, nitondra ny mavesatra
Mahatsiaro mafy sy toa mivalan-ketraka
Tsy mahalala intsony, izay mba avy any ambony
F'efa fenon'alahelo amam-besatra ny fony

Ô! Ry fiainana iny! Tsy mba fiady varotra
Fa tsy maintsy raisina 'zay anjara
Eny, na ho sarotra
Tsy mba safidim-pony ilay anaram-boninahitra
Fa sendra ny tsy fidiny, ka naleony hono...,
Iny tenany iny no ho solon'entam-barotra

Lozanao ry fiainana
Inty antambo aterakao
Fa loza loatra ianao
Loza Ray sy Reny
Eny, antambo havana

22/01/2025

Ilay natiora

03/01/2025

‼️‼️‼️FA NAHOANA.... ‼️‼️‼️

Matetika aho mandalo no misy manontany..hoe:
Nahoana hono ianao no tsy manoratra fitiavana?
Mantsy, ireny 'zao no... malaza sy hita taratra
Mainka koa hono raha haingoina sosialy...

Ny sasany aza moa dia vaky vava mihitsy, "angaha ianao adala?"
Fa tsy mahita akory ny rivo-pandrosoana
Izay maro mpahalala
Manginy, etsy andaniny, ny hoe: "angaha dia lany atao"
No mandefa saina lalina amin'izao tontolo izao

Mamelaha ahy hamaly vetivety
Hoazavaiko kely izay tsy haiko koa raha mety
Niezaka nanoratra fa tsy tafavoaka
Ilay resaka fitiavana izay be mpikalo loatra
Mora loatra mantsy, Na izany aza misaotra

Ankilany eo koa ary ny resaka sosialy
'Zay mihatra aman'aina, ary mampijaly
Angamba efa mazava fa tsy mila hazavaina
Eny! Na dia maro aza 'reo velona taraina

Naleoko ihany hiresaka 'lay sarotra takarina
Na dia tsy malaza sy tsy fantatry ny maro
Ny olom-bitsy mantsy no mitondra fandrosoana
Izany rehetra izany tsy mba fantatry ny maro

Ari-Tsento

03/10/2024

😪😪😪😪 Niriko...!

Niriko ianao hitondra fanantenana hoahy!
Ianao anefa indrisy!...
Tsy mba nahita akory 'zay mba masoandronao,
Na dia fotoana vitsy

Niriko mba hianoka 'zay sendra mba tandrify!
Kinanjo toa tsy izany!
Tsy mba nahita akory na ora, na, minitra,
Dia nivarina amin'ny tany

Niriko ianao hitondra, sy hisalotra ny anarako!
Indrisy anefa ianao
Tsy mba nahita akory na kely tamin'ny fiainako
Dia lasa ka nandao

Niriko ianao hotonga, hanefako ireo adidy
Ianao anefa, saingy,(...), tsy mba nifoha akory
Dia rendrika nikipy
Nilentika sahady ilay masoandrokelinao, izay saika hibaliaka
Indrisy tsy tanteraka ny hahatonga anao tety,
Izay ilay faniriako

Ari-Tsento
24 Desambra 2023(Ankadindratombo)

31/07/2024

FA RAHA MITSIKY IANAO, AOKA HITSIKY AMIN'NY FITIA

30/04/2024

HAJAO NY TENANAO AHAFAHAN'NY HAFA MANAJA ANAO KOA DIA HAJAO NY FITSIPIKA MIFEHY

27/03/2024

EKENA FA IANAO ILAY MPANDRESY DE IZAHO ILAY RESY TSY MIADY
TADIDIO FA TSY NISY NIADY
IANAO ILAY MPIVAROTRA TSISY AMIDY ARY IZAHO ILAY MPIVIDY TSY MANABOLA

29/02/2024