20/12/2022
Off-road ကားတွေတော်တော်များများ ဘာလို့ ဘက်ထရီအိုး (၂) လုံးပါတာလဲ??
Main Battery နဲ့ Auxillary Battery လို့ ခေါ်ပါတယ်။
Main Battery: Main Battery ရဲ့ တာ၀န်ကတော့ ကားစက်နှိုးတဲ့ Starter Motor ကို မီးအားပေးတာပါ။ သော့ဖွင့်လိုက်တဲ့ အချိန်မှာ သူက ကားစက်နှိုးဖို့အတွက် လိုင်းစချိတ်ပါတယ်။ Starter Motor မွှေ့လိုက်ပြီး စက်နိုးသွားပြီးဆိုတာနဲ့ သူ့ရဲ့ အထွက်ကို ပိတ်လိုက်ပါတယ်။ ဒါဆို သူက Starter Motor တစ်ခုကိုပဲ အားသုံးပြီး အင်ဂျင်နိုးပြီးနောက်ပိုင်း အခြား ဘက်ထရီသုံးစွဲမှုတွေအတွက် အားကို မပေးတော့ပါဘူး။ သူ့ကို အားသွင်းဖို့ အ၀င်ကိုပဲ လက်ခံပြီး အားအထွက်ကို ပိတ်ထားလို့ ဖြစ်ပါတယ်။
Auxillary Battery: သူ့ရဲ့ တာ၀န်ကတော့ Starter Motor နဲ့ မဆိုင်ပါဘူး။ သူက ကားရဲ့ အခြားသုံးစွဲမှုတွေဖြစ်တဲ့ အဲကွန်း၊ ပန်ကာ၊ မီးကြီး မီးသေး၊ စီးကရက်မီးညှိပေါက်၊ ဝိုက်ပါ၊ ဒိုင်ခွက်တွေ၊ ကွန်ပြူတာဘောက်စ်တွေ နဲ့ 110V / 12 V AC/DC ပေါက်တွေအတွက်ပဲ အလုပ်လုပ်ပါတယ်။ သူ့ကို အားပိုခံတဲ့ Dry Battery ထည့်လေ့ရှိပါတယ်။ (အရင်ခေတ်ကတော့ ဘက်ထရီခြောက်ဟာ စျေးလည်းကြီး ၀ယ်ရလည်းခက်လို့ အက်စစ်ထည့် ဘက်ထရီအသုံးများပေမယ့် ဒီဖက်ခေတ်မှာတော့ ဘက်ထရီခြောက်တွေကိုပဲ သုံးကြတဲ့အတွက် အခု SURF တွေမှာ ဘက်ထရီ ၂ ခုလုံး ကောင်းတဲ့ ဘက်ထရီတွေကိုပဲ တွေ့ရမှာပါ။ Original ကတော့ ဘက်ထရီအစို အခြောက် ၂ မျိုးနဲ့ပါ။)
ပြိုင်ဆက် လား တန်းဆက်လား?
Battery ၂ လုံးကို ပြိုင်ဆက် နည်းနဲ့ ဆက်ထားပါတယ်။ ပြိုင်ဆက်နည်းနဲ့ ဆက်တဲ့အတွက် 12 V ဖြစ်ပေမယ့် Amp (Ah) ပိုအားကောင်းပါတယ်။
အားသာချက်၊ အားနည်းချက်
အားသာချက်ကတော့ Starter Motor အတွက် ဘက်ထရီတစ်ခု သပ်သပ်ထားထားတာဖြစ်လို့ ကားအင်ဂျင်နှိုးဖို့ လိုအပ်တဲ့ ဘက်ထရီက အားကုန်သက်သာပြီး သက်တမ်းအရ ပိုခံပါတယ်။ အခြားအသုံးတွေအတွက်လည်း သပ်သပ်ထားတာဖြစ်လို့ ကားတစ်စီးလုံးရဲ့ အသုံးကိုလည်း သီးသန့်သုံးစွဲရတဲ့ စံနစ်ကို ရရှိပါတယ်။ Off-road တွေဆိုတာ တောထဲတောင်ထဲ စခန်းချပြီး ခရီးထွက်လေ့ရှိတဲ့ ကားဖြစ်တာကြောင့် အင်ဗက်တာတွေ မီးဖိုတွေ ချိတ်ဆက်ပြီး သုံးစွဲလေ့ရှိတဲ့ ကားတွေပါ။ ဒီလို တောထဲတောင်ထဲ စခန်းချပြီး မီးတွေ သုံးစွဲလိုက်ပေမယ့် Starter Battery က သပ်သပ်ထားတာ ဖြစ်လို့ အိမ်ပြန်ဖို့ စက်နှိုးရင်လည်း စက်နိုးဖို့ ဘက်ထရီသီးသန့်ထားပေးထားတဲ့ သဘောပါဗျာ။
အားနည်းချက်၊ Auxillary Battery က ဗို့အား ၁၀ ရောက်သည်အထိ သုံးစွဲခွင့် ပေးထားပေမယ့် Main Battery (Starter Battery) ကတော့ ဗို့အား ၁၁.၇ ရောက်တာနဲ့ အလိုလို ဖျက်ချပါတယ်။ Starter Motor ဟာ အားများများသုံးပြီး နှိုးရတာဖြစ်လို့ ဗို့အား ၁၁.၇ အထက်မရှိရင် စက်နိုးဖို့ ခက်ပါတယ်။ ဒါမို့ ၁၁.၇ အောက်ကို အားကျပြီဆိုတာနဲ့ အဲ့ဒီ ဘက်ထရီက အလုပ်မလုပ်တော့ပါဘူး။ ဒါမို့လည်း Hilux SURF ဘက်ထရီ ၂ လုံးပါတဲ့ ကားတွေမှာ ဘက်ထရီအိုး ၁ နှစ် က နေ ၂ နှစ်အတွင်းမှာ လဲ ရတာကို ကြုံဖူးကြမှာပါ။ အခြား Honda Fit တို့ နဲ့ စလွန်းကားတွေမှာ ဘက်ထရီအိုး တစ်လုံးကို ၃-၄ နှစ် သုံးလို့ရပေမယ့် Off-road ဘက်ထရီ ၂ လုံးကားတွေမှာတော့ ၃ နှစ်သုံးရတာ အများဆုံးလို့တောင် ဆိုရပါမယ်။ (အသုံးနည်းတဲ့ကားတွေ ၃ နှစ်ကျော် သုံးရပါတယ်) (ကျွန်တော့်ရဲ့ ဘက်ထရီ နှစ်လုံးကောင်ကတော့ ၂ နှစ်ပဲ သုံးလို့ရတယ်။)
၀ါယာရင်းပြုလုပ်ရင် သတိထားရမယ့် အချက်..
ကျွန်တော်တို့ဆီမှာ အချို့ ကားအလှဆင်ဆိုင်တွေက Main Battery, Auxillary Battery ကို ခွဲခြားမသိပါဘူး။ (ကိုယ်တွေ့ပါ.. ဆိုင်တော်တော်များများ မသိကြပါ)။ Off-road ဖြစ်တဲ့အတွက် ကျွန်တေ်ာတို့ Extra Light တွေ ဆင်ကြပါတယ်။ ရှေ့ နှင်းခွဲမီး၊ LED Bar၊ အပေါ် Spot Light ၊ Back camera light၊ စသဖြင့် မီးတွေ ဆင်ကြတယ်။ ပြီးတော့ Audio ပါ။ SURF က အော်ရဂျင်နယ်ပါတဲ့ ကက်ဆက်သံက ကောင်းတယ်ဆိုပေမယ့် Woofer မပါပါဘူး။ ဒါမို့ Woofer တွေ တပ်ကြတယ်။
ဒီအချိန်မှာ မီးလောင်နိုင်တဲ့ အန္တရာယ်ကင်းဝေးစေဖို့ အချို့ W ၀ပ်များတဲ့ မီးတွေ၊ ပစ္စည်းတွေကို ဘက်ထရီကနေ တိုက်ရိုက်ကြိုးထုတ်ပြီး တပ်ဆင်ဖို့ လိုပါတယ်။ Circuit Board ကနေ တဆင့်သွားရင် Circuit Board ခံနိုင်တဲ့ Amp ထက် ကျော်လွန်သုံးစွဲလို့ ခဏခဏ Fuse ပြတ်တာ ကြုံရမှာပါ။ Fuse ပြတ်တာ ကောင်းပါတယ်။ Fuse များ မပြတ်ခဲ့ရင် အပူလွန်ပြီး မီးလောင် နိုင်လို့ပါ။ ဥပမာ။ ။ LED Bar မီး ၃ တန်းက ၁၂၀ ၀ပ်ရှိပါတယ်။ Woofer က ၈၀ ၀ပ်အ၀င်နဲ့ အထွက် ၁၀၀၀ ၀ပ် ရှိပါတယ်။ နှင်းခွဲမီးတွေက တစ်လုံးကို ၄၀-၇၀-၁၂၀ ၀ပ်အထိ ရှိပါတယ်။ နှင်းခွဲ ၄ လုံးတပ်တာနဲ့ ၄၆၀ ၀ပ်အထိ တက်ပါတယ်။ ဒီလိုအချိန်မှာ ဆားကစ်ဘုတ်ကို မဖြတ်ပဲ ဘက်ထရီတိုက်ရိုက် နဲ့ Ingnition ကို ချိတ်ပြီး တပ်ပါတယ်။
ဒီလိုချိတ်ဆက် တပ်ဆင်တဲ့အခါမှာ တပ်ဆင်ပေးသူက နားမလည်ဘူးဆိုရင် Auxillary Battery ကနေ မယူပဲ Main Battery ကနေ သွားယူတတ်ပါတယ်။ ဒီလိုမျိုး ယူလိုက်တဲ့အတွက် အားအ၀င်နည်းတဲ့ Starter Battery ကို အားယူသုံးသလိုဖြစ်ပြီး ကားစက်နှိုးမရလို့ ခဏခဏ ဘက်ထရီလဲရတာကိုလည်း ကြုံရတတ်ပါတယ်။
ဒါကတော့ ဘက်ထရီ ၂ လုံးပါရတဲ့ အခြေခံအကြောင်းအရင်းနဲ့ ကျွန်တော်တို့တွေ သုံးစွဲတတ်တဲ့ အကြောင်းလေးတွေအချို့ကို မျှဝေပေးတာပါ။ အချို့အချက်တွေက ကျွန်တော့်ကိုယ်ပိုင်အတွေ့အကြုံတွေက ယူထားတာဖြစ်လို့ လုံး၀မှန်တယ်လို့ ယူဆဖို့ ခက်ပါမယ်။ ကျွန်တော်သိတာ တွေ့ကြုံတာတွေကလည်း အယူအဆအမှား အတွေ့အကြုံအမှားဖြစ်ချင်လည်း ဖြစ်နေနိုင်လို့ပါဗျာ..။
# Credit
# Happy Driving OFF ROAD
# CHALLENGER CLUB
