24/02/2026
MBM Life #14
✨ Ахлах сургуульд байхдаа математикийн хичээлд дуртай байлаа. Логик бодлого бодох сонирхолтой байсан нь бизнесийн удирдлага мэргэжлийг сонгоход нөлөөлсөн. Энэ чиглэлээр ажиллахад өөрийгөө байнга хөгжүүлэх, шинэ зүйл сурах шаардлагатай байдаг нь надад таарсан.
Сургуулиа төгсөөд борлуулалтын зөвлөхөөр ажлын гараагаа эхэлсэн. Дараа нь цэргийн алба хааж, гадаадад ажиллаж амьдарч туршлага хуримтлуулсан. Харин 2017 оноос Монцемент Билдинг Материалс ХХК-д ажиллаж эхэлсэн.
✅ Ажлын гол үүрэг, хариуцлага
Миний өдөр тутмын ажил агуулахтай холбоотой. Бараа материал хүлээн авах, олгох, түүхий эдийн орлого зарлага хийхээс гадна сэлбэг хэрэгслийн нөөцийг тогтвортой барих нь хамгийн чухал үүрэг.
Нөөц дутагдвал үйлдвэрийн үйл ажиллагаа тасалдах эрсдэлтэй учраас агуулахын зохион байгуулалт, тооцоолол, хариуцлагатай хандлага маш чухал гэж үздэг.
✅ Ажлын онцлог
Миний ажил биеийн хүч шаардсан, юм өргөж зөөх үе ихтэй. Тиймээс тэсвэр тэвчээр, шаламгай байдал, хурдан сэтгэн шийдвэр гаргах чадвар хэрэгтэй. Энэ ажлыг хийж байх хугацаандаа сэрээт ачигч барьж сурсан нь ажлыг илүү хөнгөвчилж, үр ашигтай болгоход их нэмэр болсон. Мөн агуулахын орчин, ашиглаж буй программ хангамж жил ирэх тусам сайжирч, ажлаа илүү зохион байгуулалттай хийх боломж бүрдэж байна.
✅ Хамт олон, уур амьсгал
Манай хамт олон аливаа асуудлыг хамтдаа ярилцаж, ойлголцож шийддэг. Баг хамт олон үр ашигтай ажиллах нь хамгийн чухал гэж боддог. Нэг үеийн залуучуудтай хамтран ажиллах нь ажлын уур амьсгалыг илүү эерэг болгодог.
✅ Хувийн амьдрал ба урам зориг
Ажлын дараа фитнессээр хичээллэж, өдрийн ядаргаагаа тайлдаг. Зарим үед e-sport тоглож амарна. Миний амьдрал энгийн ажил, фитнесс, гэр.
Ажлын туршлага нэмэгдэхийн хэрээр амьдрал, гэр бүлийн байдал ч сайжирч байна гэж боддог. Сурсан зүйлээ бодитоор ашиглаж, үр дүнг нь харах нь миний хамгийн том урам зориг.
✅ Дурсамж, зарчим, ирээдүй
Ажлын хамгийн тод дурсамж бол Улаанбаатар хотын үйлдвэр дээр анхны цемент үйлдвэрлэж эхэлсэн үе. Тэр үеэс эхлээд хийж байгаа ажил маань үйлдвэрийн үйл ажиллагаатай шууд холбоотой, хариуцлагатай гэдгийг илүү сайн ойлгосон.
Миний хувьд “муу” эсвэл “хэцүү” ажил гэж байдаггүй. Харин тухайн ажлын арга барилыг зөв олж, ойлгомжтой зохион байгуулж чадвал ямар ч ажил илүү хялбар, илүү үр дүнтэй болдог гэж боддог.
Цаашид ч ажлаа тогтвортой хийж, өөрийн зорилгодоо алхам алхмаар хүрэхийг хүсдэг. Хувийн амьдралын хувьд хүүхдүүддээ эрүүл, аюулгүй орчин бүрдүүлэх нь миний хамгийн чухал зорилго.
#Монцемент
