Opgerich aan de bar va vuurmalig Grand Café Fellini aan ‘t Pancratiusplei Noord i Heële. Historie va Con Ticci Viracocha
Op d’r 11e november van ‘t joar 1995 lope d’r Sjteven ‘Muppet’ Crieëmesj en d’r Ronald ‘Krutsh’ Voraag al zjwalkend (wie ummer) durch osz leef sjtad Heële. Op ‘t plei bei de Pancraats lope ze teëge ‘t lekkere lief van d’r Bart ‘Sjerpe Herder’ Küpesj en Henk ‘d’r Ouwe’ Pieëtesj.
Mit z’n veere sjtappe ze ‘t ieësjte betste café wat ze teëgekome binne, um doa é pilske of drie kier elluf te nuttige. Ze zette zich neëve ‘t Mie en d’r Joep á gen tieëk en besjtelle zich get beer. ‘t Mie vertelt ing wiets of twieë en d’r Joep loat ze ins flink vlege. Vuur ze tot zake kome deelt d’r Muppet nog get lollies oet en danst d’r Krutsh mit ‘t Mie. D’r Sjerpe Herder en d’r ‘Ouwe’ Henkie ensjele zich mit d’r Joep get uëver ‘t voetballe en da weët gekalt. D’r mót get mieë kultoer kome in osz leef sjtad Heële. D’r mót mieë kemauw gemakt weëde mit die daag. De gevestigde orde mot ze ins flink gerieëte kriege. ‘Loate vier osz verenige’ sjtelt d’r Krutsh vuur. En zoeë koam ‘t dat die koetenellese zich same pakde. D’r naam houwe ze sjnel gevonge. D’r Con Ticci Viracocha sjteet vuur d’r God van de vroeë zin. Va sjpas en plezeer en vöal sjeële zever. ‘t Woar oorsjprunkelik get oet de Inca kultoer. En volges de gesjrifte, d’r ieësjte vuurloper van de Vasteloavend in osz welt. Die Con Ticci’s organizeerde op de Poasj Eilande é geweldig groeët fès noa ‘t binnehoale van de eëpel en anger tsuig um te eëte. Ze doge zich sjmienke en trokke zich get ouw loemele aa die ze bei de oma oet de kist hoalde. Ze houwe plezeer vuur ’t ganse joar. D’r God, beëter bekank es d’r Con Ticci Viracocha, vong ’t allenuj geweldig en besjloot um van ‘t eendaags fès, drei dol daag te make. Doanoa houw jiekerinne 40 daag de tied um bei te kome. Die jonge oet Heële vonge ‘t é geweldig verhaal. Wat inne sjeële zever! Drei daag lang á gen tieëk hange um doanoa 40 daag bei te kome. Weë zich zoeëget verzint deë mot waal inne richtige eëpelszuuger zieë. Dus die jonge besjlote um de tradisie van die Con Ticci’s durch te zette in osz leef sjtad Heële. Ze zochte zich nog get anger koetenellese, nieënde get ouw loemele aanee, lete zich é vaandel make i Roeëme, bedankde d’r Paus vuur d’r zeëge en ginge op jats. Mit de Vasteloavend va 1996 leepe die jonge va Con Ticci vuur de ieësjte kier mit in d’r groeëte Heëlesje óptoch. Wat é sukses! In 2001 weëdt ‘t ieësjte lustrum gevierd. En wie! Ze hant zelfs inne sjieke pin loate make vuur alle fans. Vanaaf dat ieësjte lustrum va 5½ joar, organizeerde ze gans get fieëskes, zoeëwie Con Ticci’s Vasteloavendskrempel, ’t Hoafvastebal mit Leef Lüj, d’r Duutsje Rundfunk Sjlager Parade Party, d’r BBQ, d’r VasteloavendsQuiz en d’r Karaoke Carnavale. In 2007 besjteet d’r kloeb 11 joar. Onger ’t motto ’11 Joar Sjeële Zever’ loate ze alle hoeëgtepunte nog ins de r***e passere. En dat woare d’r nog al get. D’r Wiel Knipa deupde en signeerde ’t vaandel. Ze bedachte Sjtundje Knipa en Aod op Nuj. Mit de Love Boot houwe ze é knallend sukses en ing richtige weltrees. Ze ginge noa Kölle vuur Con Ticci’s Kneipe Tour en lete zich och nog zieë in Paries, Berlien, Ubachsberg, Praag en ing ganse boel anger dörper. De buffetcontroles durch Heële en umsjtreke zunt nog ummer berucht. D’r Henk en d’r Krutsh hant inmiddels och get hoeëgtepunte gehad en hant same al veer kinger in d’r kroam. Inmiddels hant ze de 2 x 11 joar och al gepasseerd. D’r Sjteven is d’r vuurzitter va Con Ticci. Heë weëdt och wal ins d’r ‘Lolliekeël’ (potloeëdventer) of d’r ‘Muppet’ geneumd. Vreuger dronk heë nog waal ins é portje of drei kier elluf op inne durchdeweëkse oavend, mar noadat heë mit ziene zaate kop ing hon in de vot hat gepopt, is zieng alcoholische carrière op non-actief gezat. Mit d’r Fozzie zurgt heë vuur d’r richtige Vasteloavendsterror i Heële. D’r Henk is d’r techneut van deë klumpkeskloep. Alles wat die angere kapot wete te kriege, makt heë wèr gans. Heë zurgt vuur de cente en vuur ‘t beer. Noa drei kinger hat heë zich mar inne knup d’r i loate legge. Genòg is genòg wah! D’r Henk wirkt urges woa ze vleegtuuge oet ee hoale en wer in é zette. Dus zitste in é vleegtuug en ’t rammelt links en rechts get, dan is de kans groeët dat d’r Henk d’r daag van te vuure wèr ins á gen tieëk hat gesjtange. D’r Bart woeëdt Sjtadsprins va Heële i 1999. D’r letste en d’r betste van de vurrige ieëw. Heë gong doanoa nog twieë joar mit op zoeng Blauw Boot ing. Doa makde heë ’t in kotte tied va Ketelbinkie tot Kapitein. Ze duijde ‘m ing blauw veer in de vot en lete ‘m aan ’t roer van die sjuut sjtoa. Mar die manne va Con Ticci koste nit zonger ‘m, dus vuur vöal geld is heë wèr truuk gegange noa die patternaatsknuppele. Heë kreeg toen d’r beinaam ‘Sjerpe Herder’. Woarum? Dat wit ginne. En da hant v’r nog d’r Gaston. D’r Oppersjef. Heë zurgt vuur alle angere sjeële zever. Zoeë is heë vuurzitter van de kadocommissie en keupt heë de kasteleins en anger gesjpuis um, um alles soepel te loate verlope. En ’t mot gezag weëde, heë hat ummer de betste ideeje. Umdat die jonge va Con Ticci beinoa uëveraal é caféverbod hant, hat heë zelf mar ing cafe i besjlag genoame. Heë is noe heerser van d’r Zjwarte Sjnuiter i Gullepe. D’r Krutsh is d’r groeëtste vleëgel en d’r creativeling van d’r kloep. Heë hat ’t logo ontworpe en sjildert zich de knök kapot. Heë viert de Vasteloavend mit de voetbalsjeun aan, makt aaf en toe inne richtige sjliding in ’t café en geet geer mit de moel d’r aa. D’r klinge Joep is ziene opvolger. Deë klinge boakseboam lupt al mit de vaan durch ’t durp. Neëve die wieksere va gewuëne lede hant ze bei Con Ticci och nog Ierelede. Da motste toch al gans get paraat ha gemakt in osz leef sjtad Heële. Angesj krieste die groeëte ier nit. Och al is ’t allenuj krauw, die jonge va Con Ticci hant ze d’r geer bei. Inne van die Ierelede, d’r Axel, hat zelfs é leedje gesjrieëve. Same mit ziene sjatteleef, ‘t Anique. ‘Doa kome ze, doa kome ze, doa kome ze allenuj aa...’ Doe kins ’t waal. ’t Leedje sjtong meteen mit sjtip op nummer 1 in d’r Limbo Top 1111. Jiekerinne zingt ‘t mit. Dus maak dich nit druk, zitste op ing kruk, haste ing n***e krak in de boet of valle dich de sjoon oet, Vasteloavend mit Con Ticci is wie ing geleupige vot mit oere. D’r vilt ummer get te beleëve mit die jonge...
