16/11/2022
حنبتدي حكوتنا الاولى من حوش بيت العمدة، العمدة المعروف بي أب شنب، راجل ممتاز وماسك امور الحلة ومسيرها وقايم بي دوروه على اكمل وجه، متزوج ٣ نسوان، حجة السرة، ام الحسن، واخرهن الدهباية، وعنده عيال كتار ما شالله، لكن بطلة قصتنا الليلة اخر العنقود، اسمح بت في الحلة، عروس الموسم، القمر الضوا، عزة، بدورها الدكتور حسن ود الحاج ميرغني، من تجار الحلة الكبار، وأمه المرحومة البتول، ماتت قبال 3 سنوات.
الحفلة كانت بي الغناية عشة ست الدلوكة، ودي كانت علامة الحلّال (جمع حلة)، معروفة بي صوتها الرنان وحركات الرقيص الإبداعية والمبتكرة، ورقصت بنات كبار الحلة. ومعاها بخيتيِ ست الطار، وحسها دة بجيب الغاشي والماشي، ما شاء الله.
رقيص عزة بت الدهباية جاب نساوين الحلة جّت عليهن، وحوش العمدة يومتا كان هاجّي وقاجّي بي حريم الحلة. حتى شفع الحلة اتلمو وشابو بالحيطة عشان يحضرو، جا البلولة ود رقية الشافع المسلط دة، ونادى معاهو جدو ود المرحومة محاسن بت حاج السماني.
عشة وبخيتيِ بدن يغنن ويهججن الحفلة قبال العروس تصل، اخوات عزة، تاجوج والتومة، معروفات بي انهم من اسمح بنات الحلة، اما حسنات وصفاء فديل اخوات العريس الكبار . وصحبات عزة، الوزيرات التلاتة، الكل واحدي بي حلاتا، امنة وخالدة ونورة، استلمن الضيافة واكرمن النساوين، بنات يسدو عين الشمس.
بعد كم غنية كدة جات العروس معا عريسا، ودخلو الحوش، ونورت السباتة، وظهرت بي توبها الأحمر الوهاج، المرصع بالدهب، والجدلة من ملوك الدهابة، وعلى انغام عشة بتقول:
(( الرزينة وحافظة اسم ابوك .. الله قادر يوم وقفوك .. الله قادر يوم سوو الفتن .. لي عزة ست العجن .. الله قادر يوم وقفوك .. خالاتا وعماتا جن ... الخ ))
بعدها فرت قرمصيصا، وقلعت توبا، وظهر الفستان البهر نساوين الحلة كلهن لمن شهقن، حتى فاطنة شنافة الحلة ما قدرت تقول بغم،
والنخيل خالة عزة وعماتا ست البنات وبت المنى يشيلن ويحصنن فيها، خايفاتن ليها من العين، عاد دي ما عزة، كاملة ومكملة، والكمال لله.
ودي كانت حكوتنا الليلة، لي رقيص بت العمدة أب شنب، استنونا في باقي حكواتنا.
