Garden World Nursery

13/06/2026

JJ sê: Camellia japonica is ’n ware winterjuweel en ons Plant van die Week, ’n immergroen struik wat in die koel maande pragtige, wasagtige blomme in skakerings van pienk, rooi of wit dra. Dit verkies halfskadu en suur grond (beste is natuurlik Acidic Blend Peatmoss van Protek ), goed‑dreinerende grond, en beloon jou met ’n elegante, stadiggroeiende vorm en luukse blare wat die hele jaar struktuur gee. Met sy lang blomseisoen en klassieke skoonheid is Camellia japonica ’n perfekte fokuspunt vir enige tuin.

𝐍𝐨𝐮 𝐛𝐞𝐬𝐤𝐢𝐤𝐛𝐚𝐚𝐫 𝐛𝐲 𝐨𝐟 𝐣𝐨𝐮 𝐧𝐚𝐚𝐬𝐭𝐞 𝐤𝐰𝐞𝐤𝐞𝐫𝐲!

13/06/2026

JJ sê: Winter bied baie natuurlike bruin materiaal, wat ideaal is om jou komposbalans reg te hou. Droë blare, klein takkies en karton kan saam met kombuisafval gemeng word om die koolstof‑stikstofverhouding te stabiliseer.

As jy die proses wil versnel, kan jy ’n hand vol ou kompos, ’n bietjie hoendermis of ’n organiese kompos aktiveerder byvoeg. In kouer streke is ’n wurmkomposbak binnenshuis of in ’n motorhuis ook ’n uitstekende opsie, aangesien wurms die beste werk tussen 15 en 25°C. Met hierdie eenvoudige aanpassings kan jy selfs in die winter ryk, lewende kompos produseer wat jou tuin in die lente ’n hupstoot gee.

Kompos is belangrik in die tuin omdat dit die grond lewendig maak, dit bou struktuur, verhoog voedingstowwe en help plante sterker, gesonder en meer bestand teen stres groei en wat is beter as om die kompos uit jou tuin weer terug te sit in jou tuin.

13/06/2026

JJ sê: In die winter werk kompos stadig, daarom is dit belangrik om jou hoop warm en aktief te hou. ’n Groter hoop van minstens een kubieke meter behou hitte beter, en die mengsel van bruin materiaal soos droë blare, karton en strooi saam met groen materiaal soos kombuisafval en vars gras help om die ontbindingsproses aan die gang te hou. Bedek die hoop met ’n seil, karton of ’n dik laag blare om hom teen koue wind en reën te beskerm, en plaas dit indien moontlik teen ’n muur of in ’n komposbak vir ekstra isolasie. Jy moet gereeld nat gooi, maar ook nie te veel nie. Die ontbindende materiaal moet soos ’n uitgedrukte spons voel nie te nat of te droog nie, en jy hoef dit net elke drie tot vier weke om te draai om hitteverlies te beperk met die eintlike doel om die hoop te deurlug.

06/06/2026

JJ sê: Bokbaai‑vygies is hierdie week se plant van die week. Plant hulle nou voor dit te laat is, al lyk die blare nie baie belowend nie en dan sal hulle jou verras om eersdaags ongelooflik mooi te blom met hul helder pienk, pers, rooi en wit blommetjies wat soos klein sonnetjies ontplof in kleur in die winterson.

Hierdie geharde, waterwyse innheemse vetplant vorm ’n lae, digte fluweel mat wat vinnig kleur en tekstuur aan enige tuin of pot gee. Hulle floreer in vol son, hou van min water en blom in oorvloed van laat winter tot vroeg somer. Met hul besonderse blomme in sprankelende kleure en maklike versorging is Bokbaai‑vygies die perfekte keuse vir sonnige beddings, rotstuine en potte waar jy ’n vrolike, onderhoudsvrye kleurspatsel wil hê.

𝐍𝐨𝐮 𝐛𝐞𝐬𝐤𝐢𝐤𝐛𝐚𝐚𝐫 𝐛𝐲 𝐨𝐟 𝐣𝐨𝐮 𝐧𝐚𝐚𝐬𝐭𝐞 𝐤𝐰𝐞𝐤𝐞𝐫𝐲!

06/06/2026

JJ sê: Mens sien altyd sulke dooie kolle op jou konifere en besef nie altyd dat die skade gedurend die wintermaande aangerig word en die skade eers later gesien word nie. Die beste manier om Italiaanse plantluise (Italian Cypress Aphids) op konifere oor die winter te beheer, is om voorkomend én sistemies op te tree want teen die tyd dat die boom bruin word, is dit reeds te laat om skade om te keer.

Die doeltreffendste winterstrategie is om ’n sistemiese insekdoder te gebruik wat deur die plant opgeneem word en die luise van binne af uitskakel. Beste is om spesiale aandag van Mei tot September toe te pas. Sistemiese vloeibare insekdoder soos Imidor kan gebruik word deur dit elke twee maande oor die hele wortelstelsel in te water.

Produkte soos Imidor of Complete 350SC van Protek word spesifiek aanbeveel vir Italiaanse sipresluise, omdat hulle langdurige beskerming bied en die plant se sapstelsel deurdring.

06/06/2026

JJ sê: Dis tyd vir ons Cymbidium orgidee om nou in die koeler maande te blom. Cymbidiums blom die beste wanneer hulle baie helder lig kry met sagte oggendson en ligte skadu in die warmste deel van die dag. Hul blare kan maar liggroen wees, dis nie ’n teken van voedingstekorte nie.

Gooi gereeld nat in die warmer somer maande deur hulle ongeveer een keer per week deeglik water te gee en effens minder in die winter, maar sorg dat die potmengsel (gewoonlik bas) altyd goed dreineer om wortelvrot te voorkom. Voer met ‘n spesiaal geformuleerde “Groeiende orgideë” kunsmis of gebruik die bekende Guanoflo van Protek wat lekker baie stikstof bevat gedurende die warmer maande. Gedurende die koeler maande kan jy met die “Blommende orgideë” kunsmis en nee, dis nie te laat nie. Beste temperature om die mooiste blomstele te vorm, is koeler nagte in die herfs (ongeveer 10–15°C), want hierdie temperatuurverskil is noodsaaklik vir blomvorming.

Mens verdeel plante gewoonlik in die winter, maar met die Cymbidiums is die beste tyd eers na blomtyd, so herfs of somer sal die beste wees en dit hoef nie jaarliks te gebeur nie, eers elk drie tot vyf jaar. Jy kan jou orgidee nou in die winter in die huis in bring om die blomme binne te geniet of buite los, net daar waar hulle is.

30/05/2026

23/05/2026

JJ sê: Siklamens is geliefde winterblomme wat goed vaar in Suid‑Afrikaanse koue, mits hulle op ’n koel, halfskaduryke plek geplant word. Hulle is redelik gehard teen ligte ryp, maar verdra nie warm somers of skroeiende middagson nie. Plant hulle in goed gedreineerde grond, want te veel vog laat die knolle maklik vrot.

Al word siklamens dikwels as binnenshuise potplante gebruik, kan kleiner spesies soos Cyclamen hederifolium en Cyclamen persicum mooi in skadutuine of bosagtige hoekies groei. Die groter, helder variëteite doen beter in potte op ’n koel stoep of in ’n helder, koel vertrek.

Met die regte posisie en matige tot min water kom hulle jaar na jaar terug. Voer deur die winter met 8:1:5 van Protek vir ekstra blomme.

23/05/2026

JJ sê: Interessant hoeveel bome nou met die storms deurgeloop het en net eenvoudig omgewaai en ontwortel was, Nou vra mens jouself af, maar waar is die penwortels wat die bome moet vashou. Hier kom ’n antwoord wat nie verwag word nie: Bome het nie penwortels nie. Meeste bome het nie meer die nood vir ’n ankerende penwortel na twee jaar nie want dan is die boom klaar gevestig en dan begin die bywortels oorneem. Wanneer ’n boom in sterk wind omwaai, kan jy hom wel red deur hom so gou moontlik weer regop te plant.

Natuurlik is dit makliker met jong bome, maar selfs daai groot ou bome wat baie estetiese waarde het, hoef nie verwyder te word nie en kan steeds gered word as jy die masjienerie tot jou beskikking het. Lig die boom versigtig op en vul die g*t met los, komposryke grond sodat die wortels weer goeie kontak maak. Trap die grond stewig vas om lugholtes te verwyder en water diep deur. Steek dan twee tot drie stewige pale aan die wind kant in en bind die stam met sagte, breë bande vas sodat hy kan stabiliseer terwyl nuwe wortels vorm.

Gooi die boom gereeld goed nat vir die volgende paar weke en verwyder die stutte nadat hy weer sterk staan. Ek sou die boom teruggesny het as dit moontlik is en Fostate soos Tuinfosfaat (Garden Phosphate) van Protek by die wortels ingemeng het vir nuwe sterk wortel ontwikkeling.