27/07/2024
Wenk vir die dag...
DIT IS KOMPOS TYD
DIE WAARDE VAN KOMPOS IN DIE TUIN.
Gesonde plante verg gesonde grond.
As bogrond net uit fyn rots bestaan het sou dit onvrugbaar gewees het. Sommige deeltjies mag wel plantvoedsel bevat maar dit is nie vrylik beskikbaar aan die plant nie.
Dit is die teenwoordigheid van humus en organiese materiaal wat bepaal hoe vrugbaar jou grond is. Ons het mos nou al lankal agtergekom hoe belangrik dit is om kompos in die tuin in te werk.
Nou is die groot vraag hoekom werk ons kompos in?
Ons weet dit doen iets aan die grond, maar wat doen dit eintlik?
Kom ons begin by Humus, dit is die afbreking van plant en diere materiaal deur mikro organismes. Met gereelde toediening hiervan verhoog ons die vrugbaarheid van die grond.
Die voordele om 'n hoë vlak van organiese materiaal in die grond te hê is eindeloos. Eerstens verhoog dit die voghou vermoë van die grond, dit werk soos 'n spons. Dit hou egter nie net die water nie, maar ook baie plantvoedsel wat andersins weg sou loog uit die grond uit.
Die tweede eienskap is dat dit die grond struktuur verbeter. In sandgrond bind dit die deeltjies saam en in kleigrond laat dit lug meer vrylik deur en laat die water ontsnap. So verbeter die plante se wortelstelsels. In leemgrond verhoog dit net die waarde van die grond.
Derdens stimuleer dit die aktiwiteite van die komplekse mikroskopiese diertjies in die grond. Hulle verseker voedsel aan die plante en waarborg 'n goeie omgewing vir die plant om in te groei.
Die ander diere wat baie belangrik is in die grond is erdwurms. Ongelukkig hou erdwurms nie van droë grond en hoë temprature nie.
Die volgende groep wat jy kry is Nematodes, Alge en Protozoa. Plante kan voedings stowwe uit die grond opneem slegs as dit in opneembare vorm is vir hulle. MAW, Die organismes in die grond is verantwoordelik daarvoor om die voedings stowwe in kompos, mis en kunsmis te verwerk sodat die plant dit kan opneem. In hierdie proses word koolstofdioksied af gegee deur die organisms, wat op hulle b***t met die vog in die grond saamsmelt en ‘n flou, suur vorm. Hierdie suur help met die oplossing van plant voedsel in die minerale partikels van die grond.
Hier is dit belangrik om op te let dat jy nie net sommer kunsmis in die grond kan sit nie, veral nie as jy nie die regte organismes het nie.
Om hierdie rede is kompos so belangrik in jou tuin en vrugte bome en groente tuin.